پنجاب سیف سٹیز اتھارٹی نے ماحولیاتی آلودگی کے تدارک کیلئے کارروائیاں تیز کر دیں

لاہور (کرائم رپورٹر) پنجاب سیف سٹیز اتھارٹی نے سموگ اور ماحولیاتی آلودگی کے تدارک کیلئے مصنوعی ذہانت پر مبنی کیمروں اور ڈرونز کی مددسے کارروائیاں تیز کر دیں۔ 10سے 12 ستمبر کے دوران صوبے بھر میں ماحولیاتی آلودگی کی 1220 خلاف ورزیوں کی نشاندہی کی گئ ی، جن کی معلومات فوری کارروائی کیلئے متعلقہ اداروں کو فراہم کی گئیں۔ ترجمان سیف سٹی کے مطابق سیف سٹی کی ورچوئل پٹرولنگ کے دوران بغیر ترپال تعمیراتی سامان لے جانے والی 551 گاڑیوں کی نشاندہی ہوئی، جن میں سے 343 کو جرمانے جبکہ 140 کو وارننگ جاری کی گئی۔ اسی طرح دھواں چھوڑنے والی 489 گاڑیوں کی نشاندہی کی گئی، جن میں سے 365 کے چالان اور 70 کو وارننگ جاری کی گئی، جبکہ سیف سٹی کی نگرانی کی مدد سے دھواں چھوڑنے والی گاڑیوں کے 152 ای چالان بھی جاری کیے گئے۔ ترجمان کے مطابق باربی کیو کے دھوئیں اور چمنیوں سے متعلق 85 خلاف ورزیوں کی نشاندہی ہوئی، جن میں سے 3 مقامات کلیئر کروائے گئے جبکہ 65 کو وارننگ دی گئی۔ بھٹوں سے دھوئیں کے اخراج کے 76 کیسز رپورٹ ہوئے، 2 بھٹے سیل، 2 مقدمات درج جبکہ دیگر کے خلاف جرمانے اور وارننگ کی کارروائیاں کی گئیں۔ صنعتی آلودگی کے بھی 13 کیسز سامنے آئے، جن میں 6 مقامات پر جرمانے جبکہ 6 کو وارننگ جاری کی گئی۔ سیف سٹی کیمروں اور ڈرونز کے ذریعے فصلوں کی باقیات اور ویسٹ برننگ کے واقعات کی بھی مسلسل نگرانی جاری ہے۔ ترجمان سیف سٹی کا کہنا ہے کہ پنجاب بھر کے سمارٹ سیف سٹی سنٹرز سے ماحولیاتی تحفظ کیلئے جدید سرویلنس سسٹم فعال ہے۔ شہری سموگ کا باعث بننے والی سرگرمیوں کی اطلاع 15 یا پبلک سیفٹی ایپ کے Connect to PSCA فیچر کے ذریعے دے سکتے ہیں۔