پنجاب یونیورسٹی ‘جوائنٹ ایکشن کمیٹی میں اٹھائے نکات پر آزادانہ انکوائری کرائی جائے:گورنر پنجاب

لاہور (جنرل رپورٹر) پنجاب یونیورسٹی کے وائس چانسلر کے خلاف جوائنٹ ایکشن کمیٹی کی جانب سے اٹھائے گئے انتظامی، مالی اور دیگر اہم معاملات پر صدر پاکستان کے نوٹس کے بعد اب گورنر پنجاب نے بھی معاملے کی آزادانہ اور شفاف انکوائری کرانے کے لیے حکومت پنجاب کو باضابطہ ہدایات جاری کر دی ہیں۔گورنر آفس کی جانب سے جاری کردہ مراسلے کے مطابق سیکرٹری ہائر ایجوکیشن ڈیپارٹمنٹ، حکومت پنجاب کو ہدایت کی گئی ہے کہ جوائنٹ ایکشن کمیٹی کی درخواست میں اٹھائے گئے نکات کا جائزہ لینے کے لیے ایک آزادانہ انکوائری عمل میں لائی جائے تاکہ تمام حقائق غیر جانبدارانہ طور پر سامنے آ سکیں۔ یہ پیشرفت جوائنٹ ایکشن کمیٹی کی مسلسل جدوجہد، قانونی و آئینی فورمز سے رجوع اور پنجاب یونیورسٹی کے انتظامی و مالی معاملات میں شفافیت، میرٹ اور ادارہ جاتی احتساب کے مطالبے کی اہم پیش رفت ہے۔ یاد رہے کہ جوائنٹ ایکشن کمیٹی، جس میں یونیورسٹی کے اساتذہ، افسران اور ملازمین شامل ہیں، گزشتہ کئی ہفتوں سے پنجاب یونیورسٹی کے انتظامی معاملات، مالی نظم و نسق، اختیارات کے استعمال اور دیگر مسائل کے حوالے سے اپنے تحفظات کا اظہار کرتی آرہی ہے۔ جوائنٹ ایکشن کمیٹی نے صدر پاکستان، گورنر پنجاب، ہائر ایجوکیشن کمیشن اور حکومت پنجاب سے مطالبہ کیا تھا کہ وائس چانسلر کے خلاف سامنے آنے والے الزامات اور انتظامی معاملات کی کسی بھی دبا سے آزاد، شفاف اور غیر جانبدارانہ انکوائری کرائی جائے۔