پاکستان سٹاک مارکیٹ میں تیزی’ کے ایس ای 100انڈیکس 172200کی سطح پر پہنچ گیا

کراچی (بزنس رپورٹر)امریکا ایران سفارتی پیش رفت کی امید، عالمی تیل سستا ہونے اور آئی ایم ایف جائزے سے مثبت توقعات کے بعد پاکستان سٹاک مارکیٹ میں خریداری کا رجحان بڑھ گیا۔ بدھ کو کے ایس ای 100انڈیکس 800سے زائد پوائنٹس اضافے کے ساتھ172200کی سطح پر بند ہوا جبکہ مارکیٹ کے سرمائے میں 84ارب روپے کا اضافہ ریکارڈ کیا گیا اور 52.82فیصد حصص کی قیمتیں بھی بڑھ گئیں۔امریکا اور ایران کے درمیان سفارتی پیش رفت کی امید سے سرمایہ کاروں کا اعتماد بہتر ہوا اور خطے میں کشیدگی کم ہونے کی توقع بڑھی اسکے علاوہ آئی ایم ایف مشن کی پاکستان آمد اور پروگرام کے جائزے سے معاشی استحکام کے حوالے سے مارکیٹ سینٹیمنٹ کو سہارا ملا۔ بینکنگ، سیمنٹ، آٹو، آئل اینڈ گیس، آئل مارکیٹنگ اور ریفائنری سیکٹرز میں خریداری نے انڈیکس کو اوپر لے جانے میں اہم کردار ادا کیا جس کی وجہ سے کاروباری ہفتے کے تیسرے دن پاکستان اسٹاک مارکیٹ میں کاروبارکا اختتام تیزی پر ہوا،کے ایس ای 100انڈیکس 830پوائنٹس اضافے سے 171402پوائنٹس سے بڑھ کر 172232پوائنٹس پر بند ہوا اسی طرح 285پوائنٹس کے اضافے سے کے ایس ای 30انڈیکس 51283پوائنٹس اور کے ایس ای آل شیئرز انڈیکس 103762پوائنٹس سے بڑھ کر 104231پوائنٹس پر پہنچ گیا۔