تجاوزات کیخلاف پیرا فورس کی کارروائی، بھاری جرمانے اور دکانیں سیل

تلہ گنگ (نمائندہ خبریں )تجاوزات کے خلاف جاری کارروائیوں کے تسلسل میں کل کی طرح آج بھی پیرا فورس نے اے ڈی سی سلمان منشا اور اسسٹنٹ کمشنر سورتھ مبشر کی زیرِ نگرانی شہر کا گشت کیا۔ اس موقع پر انسپکٹر محمد احتشام اور ان کی ٹیم نے مختلف مقامات کا معائنہ کیا اور فٹ پاتھوں اور مین روڈ پر تجاوزات قائم کرنے اور سامان رکھنے والے افراد کے خلاف کارروائی عمل میں لائی۔دورانِ کارروائی متعدد تجاوزات کو موقع پر ختم کروایا گیا جبکہ خلاف ورزی کرنے والوں پر مجموعی طور پر 34,000 روپے کے جرمانے عائد کیے گئے۔ اس کے علاوہ خلاف ورزی پر بعض دکانیں بھی سیل کی گئیں۔پیرا فورس کی جانب سے دکانداروں اور ریڑھی بانوں کو واضح ہدایات اور وارننگ جاری کی گئی کہ فٹ پاتھوں اور مین روڈ پر کسی قسم کی تجاوزات یا ریڑھی لگانے کی اجازت نہیں دی جائے گی۔ صرف مقررہ ریڑھی بازار میں ریڑھیاں لگانے کی اجازت ہوگی، جبکہ آئندہ خلاف ورزی کی صورت میں مزید سخت قانونی کارروائی عمل میں لائی جائے گی۔