صدر مملکت آصف علی زرداری نے کہا ہے کہ سیاحت کے شعبے میں جدید ٹیکنالوجی اور مصنوعی ذہانت (اے آئی) کے استعمال کو اخلاقی اصولوں سے ہم آہنگ کیا جانا چاہیے تاکہ مقامی معیشت اور عوام کو فائدہ پہنچایا جا سکے۔
عالمی یومِ سیاحت 2026 کے موقع پر اپنے پیغام میں صدر زرداری نے کہا کہ اس سال کا موضوع ’’سیاحت کی نئی تشکیل کے لیے ڈیجیٹل ایجنڈا اور مصنوعی ذہانت‘‘ ہے، جو اس بات کی عکاسی کرتا ہے کہ ڈیجیٹل ٹیکنالوجی اور اے آئی لوگوں کے سفر کی منصوبہ بندی، سیاحتی مقامات کی تلاش اور مختلف ثقافتوں کے تجربے کے طریقوں کو تبدیل کر رہے ہیں۔
صدر مملکت نے زور دیا کہ ٹیکنالوجی میں آنے والی تبدیلیاں ذمہ دارانہ، جامع اور عوام و مقامی برادریوں کے لیے فائدہ مند ہونی چاہئیں۔ انہوں نے کہا کہ پاکستان کو ایسا سیاحتی شعبہ تشکیل دینا چاہیے جو جدت کو اپنائے لیکن مہمان نوازی، احترام اور ذمہ داری کی روایتی اقدار سے جڑا رہے۔
انہوں نے کہا کہ پاکستان کے پاس شمالی علاقوں کے پہاڑوں، وادیٔ سندھ کی قدیم تہذیبوں، اسلامی و گندھارا ورثے، شہروں، صحراؤں اور ساحلی علاقوں سمیت سیاحتی مقامات کی غیر معمولی تنوع موجود ہے، جبکہ پاکستانی عوام کی مہمان نوازی ملک کی ایک بڑی طاقت ہے۔
