یمن کی بین الاقوامی طور پر تسلیم شدہ حکومت کی فوج کا کہنا ہے کہ گزشتہ 72 گھنٹوں کے دوران حوثیوں کے خلاف 756 فوجی کارروائیاں کی گئیں، جن میں 2,316 حوثی جنگجو ہلاک یا زخمی ہوئے۔ یمنی فوج کے ترجمان بریگیڈیئر جنرل مجید عبداللہ النزیلی کے مطابق کارروائیوں میں فضائی حملوں، ڈرونز، توپ خانے اور راکٹ سسٹمز کا استعمال کیا گیا۔
یمنی فوج کے مطابق کارروائیاں تعز، الجوف، مأرب، البیضاء، لحج اور دیگر علاقوں میں حوثی ٹھکانوں کے خلاف کی گئیں۔ فوجی ترجمان نے یہ دعویٰ بھی کیا کہ تعز میں ڈرون اور میزائل آپریشنز میں معاونت کرنے والے 4 ایرانی ماہرین بھی مارے گئے۔ تاہم ان ہلاکتوں اور مجموعی اعدادوشمار کی آزادانہ طور پر تصدیق نہیں ہوسکی۔
یہ کارروائیاں یمن میں حوثیوں اور حکومت نواز فورسز کے درمیان بڑھتی ہوئی کشیدگی کے دوران ہوئی ہیں۔ اسی دوران تعز میں ایک مارکیٹ پر فضائی حملے میں حوثی حکام کے مطابق 7 افراد جاں بحق اور تقریباً 40 زخمی ہوئے، جبکہ یمنی حکومت کا کہنا ہے کہ کارروائی میں مارکیٹ کے قریب موجود حوثی فوجی کیمپ اور گاڑیوں کو نشانہ بنایا گیا تھا۔
