اکتوبر’لیاقت علی خان ‘مولانا اعظم طارق قتل’فاروق لغاری’غلام اسحاق خان کا انتقال ہوا

کہروڑپکا(رپورٹ/محمد افضل جاوید) اکتوبر ‘ پاکستان میں اہم قومی و سیاسی واقعات کا مہینہ ۔ میاں نواز شریف نے 4 سالہ جلاوطنی کے بعد اکتوبرمیں لاہور جلسے سے خطاب کیا۔ گزشتہ سال اکتوبر میں پاک افغان سرحد پر جھڑپوں کے بعد شدید کشیدگی پیدا ہوئی اور پاکستان نے حملے کی کوششوں کا منہ توڑ جواب دیا مگر بعد میں قطر اور ترکی کی ثالثی میں 19 اکتوبر 2025 کو جنگ بندی کا اعلان کیا گیا۔ لاہور میں احتجاج اور جھڑپوں میں پولیس اہلکار سمیت 5 افراد کی ہلاکت کے بعد TLP کا لانگ مارچ اسلام آباد روانہ ہوا مگر پر تشدد احتجاج پر وفاقی حکومت نے 23 اکتوبر 2025 کو تنظیم پر پابندی لگا دی۔ شنگھائی تعاون تنظیم کا سربراہی اجلاس اکتوبر 2024 میں پاکستان کی میزبانی میں منعقد ہوا۔ پرویز مشرف کے مارشل لائ لگانے اور نواز شریف کی دوسری حکومت کی برطرفی کا مہینہ بھی اکتوبر۔ سانحہ کار ساز رونما ہوا۔ پہلے وزیر اعظم لیاقت علی خان اور مولانا اعظم طارق کا قتل بھی اکتوبر کا اہم واقعہ۔سابق صدور فاروق لغاری اور غلام اسحاق خان بھی اسی ماہ دنیا سے رخصت ہوئے۔تفصیل کیمطابق طویل گرمی اور حبس کے بعد آج سے شروع ہونے والا اکتوبر ماضی کے اہم واقعات کا گواہ ہے۔اپنے علاج کیلئے لندن میں مقیم مسلم لیگ کے صدر میاں نواز شریف خود ساختہ جلاوطنی ختم کرکے 21 اکتوبر 2023 کو واپس آئے اور لاہور میں ایک بڑے جلسے سے خطاب میں انہوں نے اپنے مقدمات میں عدالتوں کا سامنا کرنے کا اعلان کیا۔ اکتوبر 2024 میں شنگھائی تعاون تنظیم کا سربراہی اجلاس اسلام آباد میں منعقد ہوا۔چینی وزیراعظم اور انڈین وزیر خارجہ جے شنکر کی کانفرنس میں شرکت کو عالمی میڈیا میں خاصی اہمیت دی گئی تاہم اس موقع پر تحریک انصاف کی احتجاجی کال پر ورکرز کی پکڑ دھکڑ اور راستوں کی بندش پر شہریوں کو سخت مشکلات کا سامنا بھی کرنا پڑا۔فیلڈ مارشل جنرل محمد ایوب خان نے 7 اکتوبر 1958 کو مارشل لاء لگا کر ملک میں فوجی بغاوت کی بنیاد رکھی جبکہ حالیہ تاریخ کا آخری مارشل لاء بھی اکتوبر میں نافذ ہوا۔ کارگل و دیگر ایشوز پر جنرل پرویز مشرف نے 12 اکتوبر 1999 کو مارشل لاء لگا کر اقتدار پر قبضہ کر لیا جبکہ دوسری بار وزیر اعظم بننے والے میاں نواز شریف کوبرطرف کر کے منتخب قیادت کو جیلوں میں ڈال دیا گیا۔ملکی تاریخ کا ہولناک زلزلہ 8 اکتوبر 2005 کو آیا۔جس کے نتیجہ میں شمالی علاقہ جات مانسہرہ،بٹل بٹگڑام اور بالا کوٹ میں تباہی آئی اور ہزاروں شہر ی جاں بحق و بے گھر ہوگئے۔ لڑکیوں کی تعلیم کیلئے سر گرم سوات کی طالبہ ملالہ یوسفزئی پر حملہ 9 اکتوبر 2012 کو ہوا۔ شدت پسندوں کے حملے میں ملالہ اور اسکی ساتھی دو طالبات کائنات و شازیہ بھی زخمی ہو گئیں۔اسمبلیاں توڑنے میں شہرت حاصل کرنے والے دو سابق صدور کی وفات بھی اسی ماہ ہوئی۔غلام اسحاق خان27 اکتوبر 2006کو پشاور میں وفات پاگئے جبکہ بینظیر بھٹو حکومت ختم کرنے والے سردار فاروق احمد لغاری نے اکتوبر 2010میں وفات پائی۔سابق وزیراعظم عمران خان کی پیدائش 5 اکتوبر 1952کو لاہور میں ہوئی۔اس اکتوبر میں انکی 74 ویں سالگرہ ہے۔اسی طرح بانی تحریک انصاف کا یادگار جلسہ بھی مینار پاکستان پر 2011 کے اکتوبر میں ہی منعقد ہوا۔تجزیہ نگاروں کے مطابق اسی جلسے نے عمران خان کی مقبولیت میں اضافہ کیا۔بانی PTI نے ریحام خان کو طلاق اکتوبر 2015 میں دیکر 10 ماہ کی ازدواجی زندگی ختم کردی۔جے یو آئی کے رہنما مولانا مفتی محمود نے 14اکتوبر 1980کو وفات پائی۔طویل جلا وطنی کے بعد واپسی پر محترمہ بے نظیر بھٹو کے جلوس پر 18 اکتوبر 2007 کو حملہ ہوا۔سانحہ کارساز کراچی میں بینظیر بھٹو کو نشانہ بنانے کی کوشش کی گئی۔اس حادثہ میں کئی PPP کارکن جانبحق و زخمی ہوگئے۔ اہلسنت والجماعت کے ممبر قومی اسمبلی مولانا اعظم طارق کو 6 اکتوبر 2004 کو اسلام آباد میں ٹول پلازہ کے قریب قتل کر دیا گیا۔اکتوبر 2021 میں رہنما تحریک لبیک علامہ سعد رضوی کو رہا نہ کرنے پر تحریک کے کارکنوں نے احتجاج شروع کردیا۔ ہنگامہ آرائی میں تین پولیس اہلکار جان بحق جبکہ درجنوں شہری زخمی ہوگئے اور پنجاب میں رینجرز طلب کرلی گئی۔ قائدِ ملت و پہلے پاکستانی وزیر اعظم نوابزدہ لیاقت علی خان کو 16 اکتوبر 1951کو پنڈی کے ایک جلسے میں گولی مار کر شہید کر دیا گیا۔ ملک میں تین عام انتخابات 1990،1993, اور 2002 کا انعقاد بھی ماہِ اکتوبر میں ہوا۔