موٹر سائیکلوں گاڑیوں کی چوری وارداتیں میں بے تحاشہ اضافہ پولیس خاموش تماشائی

لاہور(محمد کامران سے)شہر لاہور ایک بڑا
اقتصادی و سیاسی مرکز، آج کل ایک سنگین مسئلے کا شکار ہے۔ موٹر سائیکلوں اور گاڑیوں کی چوری کی وارداتیں دن بدن بڑھتی جا رہی ہیں اور پولیس ان واقعات پر خاموش تماشائی بنی ہوئی نظر آتی ہے۔ گزشتہ تین ماہ کے دوران لاہور سمیت پنجاب کے بڑے شہروں سے ریکارڈ تعداد میں گاڑیاں اور موٹر سائیکلیں چوری ہو چکی ہیں، جن میں سے اکثر اب تک برآمد نہیں ہو سکیں۔ سی سی ٹی وی کیمروں کی موجودگی کے باوجود چور دن دھاڑے لوگوں کی قیمتی گاڑیاں اور موٹر سائیکلیں چرا کر لے جاتے ہیں، اور ذمہ دار ادارے اس پر کوئی مثر کارروائی کرنے میں ناکام نظر آتے ہیں۔ یہ صورتحال نہ صرف عام شہریوں کے لیے پریشانی کا باعث بن رہی ہے بلکہ معاشرتی امن و امان پر بھی سنگین سوالیہ نشان کھڑا کر رہی ہیجس کا شکار صحافی برادری بھی ہو رہے ہے۔ لاہور پریس کلب کے سامنے سے گزشتہ دنوں صحافی خاتون صائمہ نواز کی گاڑی چوری ہو جانا اس سلسلے کی تازہ ترین مثال ہے۔ پریس کلب کے ارد گرد سے پہلے بھی متعدد گاڑیاں چوری ہو چکی ہیں، چور اب اتنے بے خوف ہو چکے ہیں کہ وہ صحافیوں اور عوامی مقامات کے قریب بھی اپنی سرگرمیاں جاری رکھے ہوئے ہیں۔ گاڑیوں کی چوری صرف ایک معمولی جرم نہیں بلکہ ایک منظم نیٹ ورک کا حصہ معلوم ہوتا ہے۔ یہ چور اکثر رات کے اندھیرے یا دن کی روشنی میں بھی ہدف بناتے ہیں، اور جدید ٹیکنالوجی کے باوجود ان کا پتہ لگانا مشکل ہو رہا ہے۔ پولیس کے پاس سی سی ٹی وی فوٹیج موجود ہوتی ہے، مگر تحقیقات میں سستی، وسائل کی کمی یا بعض اوقات عدم دلچسپی کی وجہ سے مقدمات حل نہیں ہو پاتے۔ نتیجتا چور آزاد گھومتے ہیں اور عام آدمی اپنی گاڑی یا موٹر سائیکل کھونے کے بعد مہینوں بلکہ سالوں تک انصاف کے منتظر رہتا ہے۔ اس مسئلے کی جڑیں گہری ہیں۔ ایک طرف پولیس کی کارروائی میں سستی اور دوسری طرف قوانین کی کمزوری ہے۔ موجودہ قوانین میں گاڑی چوری کرنے والوں کے لیے سزائیں اتنی سخت نہیں جو انہیں روک سکیں۔ اگر چور کو پکڑ بھی لیا جائے تو وہ ضمانت پر باہر نکل آتا ہے یا مقدمہ کمزور ہونے کی وجہ سے رہا ہو جاتا ہے۔ اس کے علاوہ چوری شدہ گاڑیوں کو پارٹس میں توڑ کر فروخت کرنے کا کاروبار بھی عروج پر ہے، جو اس جرائم کے نیٹ ورک کو مزید تقویت دیتا ہے۔ حکومت پنجاب اور خصوصا وزیر اعلی کو اس معاملے پر فوری اور سخت نوٹس لینا چاہیے۔ محض بیانات یا معمولی کارروائیاں کافی نہیں۔ ضرورت اس امر کی ہے کہ گاڑیوں کی چوری کے خلاف خصوصی ٹاسک فورس تشکیل دی جائے، جو جدید ٹیکنالوجی، جی پی ایس ٹریکنگ اور انٹیلی جنس کی بنیاد پر کام کرے۔ تمام بڑے شہروں میں سی سی ٹی وی نیٹ ورک کو مزید مضبوط کیا جائے اور رئیل ٹائم مانیٹرنگ کا نظام قائم کیا جائے۔ اس کے ساتھ ساتھ تھانوں میں درج ایف آئی آر پر فوری کارروائی یقینی بنائی جائے اور ان مقدمات کی باقاعدہ نگرانی کی جائے۔ سخت قوانین بنانے کی بھی اشد ضرورت ہے۔ گاڑی چوری کرنے والوں کے لیے غیر ضمانتی گرفتاری اور طویل قید کی سزا مقرر کی جائے تاکہ مجرم خوف زدہ ہوں۔ چوری شدہ گاڑیوں کو خریدنے یا پارٹس میں تبدیل کرنے والوں کے خلاف بھی سخت کارروائی کی جائے۔ پولیس افسران کو خصوصی تربیت دی جائے اور ان کی کارکردگی کا جائزہ گاڑیوں کی برآمدی شرح پر رکھا جائے۔ جو افسر اس معاملے میں کامیابی حاصل کرے اسے انعام دیا جائے اور ناکام رہنے والوں کے خلاف جوابدہی کا نظام بنایا جائے۔ شہریوں کو بھی آگاہی مہم چلائی جائے کہ وہ اپنی گاڑیوں پر حفاظتی آلات نصب کریں، پارکنگ کے محفوظ مقامات کا انتخاب کریں اور شبہ کی صورت میں فوری پولیس کو اطلاع دیں۔ تاہم بنیادی ذمہ داری ریاست کی ہے۔ جب عام آدمی اپنی محنت کی کمائی سے خریدی ہوئی گاڑی یا موٹر سائیکل دن دہاڑے کھو دے اور پولیس خاموش تماشائی بن جائے تو اس کا اعتماد ریاستی اداروں پر سے اٹھ جاتا ہے۔