جیلوںمیں کرپشن، اختیارات کے ناجائز استعمال کو روکنے کیلئے مراسلہ جاری

لاہور (کرائم رپورٹر) آئی جی جیل خانہ جات پنجاب میاں سالک جلال نے صوبے کی جیلوں میں کرپشن، بدعنوانی اور اختیارات کے ناجائز استعمال کی روک تھام کیلئے سخت احتسابی اقدامات کا مراسلہ جاری کر دیا۔ جاری کردہ مراسلے کے مطابق جیل افسران اور اہلکاروں پر قیدیوں کے رشتہ داروں سے تعلقات استوار کرنے، کاروباری ڈیل کرنے اور تحائف لینے پر پابندی عائد کر دی گئی ہے۔ خلاف ورزی ثابت ہونے پر فوجداری مقدمے کے ساتھ محکمانہ کارروائی بھی ہوگی، جبکہ متعلقہ نگران افسر کو بھی ذمہ دار ٹھہرایا جائے گا۔ مراسلے میں تمام ریجنل ڈپٹی انسپکٹر جنرلز اور سپرنٹنڈنٹس جیلز کو کرپٹ عناصر کے خلاف کارروائیاں کرنے کی ہدایت کی گئی ہے۔ جیلوں میں رشوت اور مالی بے ضابطگیوں پر زیرو ٹالرنس پالیسی اپنانے کا حکم دیتے ہوئے ریجنل ڈی آئی جیز کو جیلوں، سرکاری اسٹورز، راشن گوداموں اور کیش بکس کے اچانک معائنے کرنے کی ہدایت کی گئی ہے۔ سپرنٹنڈنٹ جیل ہر چھ ماہ بعد سرکاری اسٹورز کی فزیکل ویری فکیشن کا پابند ہوگا۔ مراسلے کے مطابق قیدیوں کو فراہم کیے جانے والے کھانے کی مقدار اور معیار میں کسی قسم کی کمی برداشت نہیں کی جائے گی۔ ڈپٹی سپرنٹنڈنٹ جیل روزانہ راشن کی وصولی، وزن اور تقسیم کی جانچ کرے گا، جبکہ کچن اور وارڈز کے اچانک معائنے بھی لازمی ہوں گے۔ جیلوں میں بدعنوانی کے امکانات کم کرنے کیلئے حساس ڈیوٹیوں پر تعینات عملے کو ہر ماہ تبدیل کرنے کی ہدایت کی گئی ہے۔ کوئی اہلکار ایک ہی حساس ڈیوٹی پر ایک ماہ سے زیادہ تعینات نہیں رہے گا۔ آئی جی جیل خانہ جات نے اختیارات کے ناجائز استعمال سے متعلق شکایات پر فوری کارروائی اور ان کا باقاعدہ ریکارڈ رکھنے کی ہدایت بھی کی ہے۔ شکایات پر کارروائی میں تاخیر کرنے والے افسران کے خلاف محکمانہ کارروائی ہوگی، جبکہ جیل ریکارڈ میں کرپٹ اہلکاروں کو تحفظ دینے والے افسران بھی جواب دہ ہوں گے۔