گوجرخان میں ڈکیتی و چوری کی متعدد وارداتیں جاری

گوجرخان (بیورو رپورٹ) گوجرخان میں ڈکیتی اور چوری کی متعدد وارداتوں کے دوران لاکھوں روپے مالیت کے قیمتی موبائل فونز، نقدی، گھریلو سامان اور بکری چوری کرلی گئی، پولیس نے تمام واقعات کے الگ الگ مقدمات درج کرکے
تفتیش شروع کردی۔ تفصیلات کے مطابق حسن عابد، جو گوجرخان میں واقع موبائل فون شاپ کے لیے قیمتی موبائل فونز، آئی فونز اور پینلز خرید کر راولپنڈی کچہری اسٹاپ پر موجود تھا، گوجرخان جانے کے لیے سواری کا انتظار کررہا تھا کہ اس دوران ایک نامعلوم نوجوان اس کے پاس آیا اور کہا کہ اس نے بھی گوجرخان جانا ہے، لہذا دونوں بائیکیا پر چلتے ہیں۔ حسن عابد کے مطابق گوجرخان میں سواع حسین شہید اسٹیڈیم کے قریب پہنچنے پر مذکورہ نوجوان بائیکیا سوار کو رانگ سائیڈ پر واقع ایک غیر آباد مکان کی طرف لے گیا، جہاں پہلے سے موجود ایک اور نامعلوم شخص باہر نکل آیا۔ دونوں ملزمان نے مبینہ طور پر حسن عابد سے آئی فون 15 پلس، ویوو اسمارٹ فون، گوگل پکسل موبائل فون، موبائل فون پینلز اور نقدی چھین لی، جبکہ مزاحمت یا دوبارہ واپس آنے کی صورت میں جان سے مارنے کی دھمکیاں دیتے ہوئے اسے اور بائیکیا سوار کو وہاں سے بھگا دیا۔ پولیس حکام کے مطابق واردات کے دوران تقریبا 3 لاکھ 30 ہزار روپے مالیت کے اسمارٹ فونز، 15 ہزار روپے مالیت کے موبائل فون پینلز اور 12 ہزار روپے نقدی چھینی گئی۔ دوسری جانب چوری کی واردات میں سوہاوہ مرزا کے علاقے میں نوید الطاف کیانی کے گھر سے شاور اور واش رومز کی ٹوٹیاں چوری کرلی گئیں، جبکہ تھانہ مندرہ کے علاقے سنگھوری میں ظفر محمود ستی کے گھر سے یو پی ایس، ایل ای ڈی اور دیگر قیمتی گھریلو سامان چوری ہوگیا۔ ادھر پولیس چوکی قاضیاں کے علاقے دریالہ سیگن، موہڑہ بھٹیاں میں محمد سرور کی صحن میں بندھی تقریبا ایک لاکھ روپے مالیت کی بکری بھی نامعلوم چور لے اڑے۔ پولیس حکام کے مطابق تمام واقعات کے الگ الگ مقدمات درج کرلیے گئے ہیں اور ملزمان کی تلاش سمیت مزید تفتیش جاری ہے۔