شبقدر(نیوز ایجنسیاں )وفاقی وزیرِ داخلہ محسن نقوی نے کہا ہے کہ ریاست کیخلاف تقریریں
کرنے، توڑ پھوڑ کرنے اور لوگوں کو حکومت کے خلاف اکسانے والے عناصر سے کوئی نرمی نہیں برتی جائے گی، وہ شبقدر ٹریننگ سنٹر میں فیڈرل کانسٹیبلری(ایف سی) کے سپیشل پروٹیکشن ونگ اور اینٹی رائٹ ونگ کے پہلے بیچ کی پاسنگ آئو ٹ پریڈ سے بطور مہمانِ خصوصی خطاب کررہے تھے۔ شبقدر ٹریننگ سینٹر میں منعقدہ اس پروقار اور تاریخی تقریب میں تاریخ میں پہلی بار چاروں صوبوں، آزاد جموں و کشمیر اور گلگت بلتستان سے تعلق رکھنے والے 983جوان پاس آئوٹ ہوئے، جن میں 35خواتین بھی شامل ہیں، یہ جوان فیڈرل کانسٹیبلری کے نئے قائم ہونے والے اسپیشل پروٹیکشن ونگ اور اینٹی رائٹ ونگ کا حصہ بن چکے ہیں، جو ملکی تاریخ میں ایک منفرد اور اہم سنگِ میل ہے، اس پاس آؤٹ پریڈ کی خاص بات اس میں ملک کے تمام حصوں یعنی چاروں صوبوں کے ساتھ ساتھ آزاد کشمیر اور گلگت بلتستان کے نوجوانوں اور بالخصوص خواتین کی بھرپور شمولیت تھی ۔ تقریب سے خطاب کرتے ہوئے وفاقی وزیرِ داخلہ محسن نقوی نے سخت وارننگ جاری کی کہ جو عناصر ریاست کے خلاف زہر اگلتے ہیں، توڑ پھوڑ میں ملوث ہیں اور عوام الناس کو حکومت کے خلاف بغاوت پر اکساتے ہیں، ان سے آہنی ہاتھوں سے نمٹا جائے گا اور قانون شکنی کرنے والوں کو کسی صورت معاف نہیں کیا جائے گا، انہوں نے قانون کی بالا دستی کو ہر قیمت پر یقینی بنانے کے عزم کا اعادہ کیا۔وزیرِ داخلہ نے فیڈرل کانسٹیبلری کی خدمات کو سراہتے ہوئے کہا کہ ایف سی ہمیشہ ملک میں امن کے قیام کے لئے ہمیشہ پہلی صف میں رہی ہے، یہ فورس دہشت گردی کے خلاف فیصلہ کن آپریشنز، اہم سرکاری تنصیبات کی حفاظت، قومی سطح کے ترقیاتی منصوبوں کی سکیورٹی اور ملک بھر میں امن و امان کی بحالی کے فرائض انتہائی جرأت اور بہادری کے ساتھ سر انجام دے رہی ہے۔پاس آئوٹ ہونے والے نئے جوانوں سے مخاطب ہوتے ہوئے محسن نقوی نے کہا کہ وہ پہلی مرتبہ وفاقی حکومت کیلئے اسپیشل پروٹیکشن ونگ اور اینٹی رائٹ ونگ کی ذمہ داریاں سنبھال رہے ہیں، جو کہ ایک انتہائی اہم اور تاریخی مشن ہے، انہوں نے جوانوں پر زور دیا کہ ان کے کندھوں پر ریاست کے تحفظ اور قانون و آئین کی پاسداری کی بڑی ذمہ داری عائد ہوتی ہے، جسے انہیں پوری دیانت داری اور پیشہ ورانہ مہارت سے نبھانا ہوگا۔
محسن نقوی
