بڑھتی فضائی آلودگی اورسموگ، لاہورچڑیا گھر میں جانوروں کی صحت سے متعلق حالات پر تشویش

لاہور (آئی این پی) لاہور چڑیا گھر میں جانوروں کی صحت سے متعلق سامنے آنے والی اطلاعات نے تشویش پیدا کر دی، شہر میں بڑھتی فضائی آلودگی اور سموگ کے باعث چڑیا گھر میں موجود جنگلی جانوروں اور پرندوں کی صحت کو بھی خطرات لاحق ہونے کا خدشہ ظاہر کیا جا رہا ہے۔ جانوروں میں بیماریوں کی علامات، سانس کے مسائل اور موسمی اثرات کے پیش نظر طبی نگرانی، بروقت تشخیص اور علاج معالجے کے انتظامات کی اہمیت بڑھ گئی ہے۔ رپورٹ کے مطابق چڑیا گھر میں جانوروں کی صحت سے متعلق موصول ہونے والی اطلاعات کے تناظر میں ویٹرنری عملے کی نگرانی، بیماریوں کی بروقت نشاندہی اور علاج کے انتظامات کا معاملہ اہمیت اختیار کر گیا ہے، تاہم کسی مخصوص بیماری کے پھیلاو یا جانوروں میں وبا کی سرکاری تصدیق تاحال دستیاب نہیں ہو سکی۔دوسری جانب لاہور چڑیا گھر کے سینئر ویٹرنری افسر ڈاکٹر محمد اظہر نے حالیہ رپورٹ میں خبردار کیا ہے کہ سموگ میں موجود باریک آلودہ ذرات جانوروں کے پھیپھڑوں تک پہنچ کر سانس کی بیماریوں کا سبب بن سکتے ہیں، جبکہ اوزون اور زہریلی گیسیں بھی ان کی سانس کی نالیوں میں سوزش پیدا کر سکتی ہیں۔ ان کے مطابق آلودہ فضا میں طویل عرصے تک رہنے سے جانوروں اور پرندوں کی صحت، قدرتی عمر اور افزائش نسل کی صلاحیت بھی متاثر ہو سکتی ہے۔لاہور چڑیا گھر کے ڈپٹی ڈائریکٹر شہزیب خورشید کے مطابق چڑیا گھروں اور سفاری پارکس میں موجود جانوروں کو باقاعدگی سے ویکسینیشن، موسمی ضروریات کے مطابق خوراک اور درجہ حرارت کے مطابق نگہداشت فراہم کی جاتی ہے تاکہ ان کی صحت بہتر رکھی جا سکے۔محکمہ جنگلی حیات کی جانب سے قیدی جنگلی جانوروں کی تشخیص اور علاج کے لئے جدید سہولیات متعارف کروانے کے اقدامات بھی کیے گئے ہیں۔ رواں سال لاہور چڑیا گھر کے ایک ہرن اور اژدھے کے طبی معائنے کے لئے پنجرے میں ہی پورٹیبل ایکسرے کی سہولت استعمال کی گئی تھی، جس سے جانوروں کو ہسپتال منتقل کرنے کے دوران پیش آنے والے دباو اور طبی پیچیدگیوں میں کمی ممکن ہے تاہم جانوروں کی بیماریوں سے متعلق اطلاعات کے تناظر میں یہ سوال اہمیت اختیار کر گیا ہے کہ چڑیا گھر میں موجود تمام جانوروں کی روزانہ طبی جانچ، بیماریوں کی بروقت تشخیص، متاثرہ جانوروں کو الگ رکھنے اور علاج کے لئے کیا موثر انتظامات کیے جا رہے ہیں۔