شارجہ: سرفراز احمد نے فکسنگ رپورٹ سے اپنے کوچ مکی آرتھر کا دل بھی جیت لیا۔پاکستان کرکٹ بورڈ کی جانب سے اعلامیہ میں کہا گیا تھا کہ پاکستان کے ایک پلیئر کو فکسنگ کی آفر ہوئی جس سے انھوں نے فوری طور پر ٹیم مینجمنٹ کو آگاہ کیا، جس کے بعد آئی سی سی کو بھی مطلع کردیا ہے جس نے معاملے کی چھان بین شروع کردی ہے، اگرچہ بورڈ کی جانب سے پلیئر کا نام ظاہر نہیں کیا گیا تاہم بعد میں یہ بات سامنے آگئی کہ مذکورہ کھلاڑی کپتان سرفراز احمد تھے، جنھوں نے فرض شناسی کا مظاہرہ کرتے ہوئے فکسنگ رابطے کی فوری رپورٹ کی۔ہیڈ کوچ بھی کپتان کے طرز عمل سے کافی خوش ہیں، وہ کہتے ہیں کہ حقیقت تو یہ ہے کہ انھوں نے ناقابل یقین طور پر بہترین ردعمل پیش کیا ہے، انھوں نے وہی کیا جو کہ ان کو کرنا چاہیے تھا، جس خوبصورتی سے انھوں نے معاملے کو ہینڈل کیا میں سمجھتا ہوں کہ وہ ہماری ٹیم اور دنیا کے لیے مثال ہے کہ ایک اہم ترین کھلاڑی سے رابطہ کیا گیا جنھوں نے قانون کے مطابق ردعمل ظاہر کرتے ہوئے خود کو کھیل کا ایک سچا سفیر ثابت کیا ہے۔
مکی آرتھر نے مزید کہا کہ میں اپنے کھلاڑیوں سے کافی مطمئن ہوں، وہ غیرمعمولی اور کافی ذہین ہیں، مجھے اس بارے میں کوئی شک نہیں کہ اگر ان میں سے بھی کسی سے کوئی مشکوک رابطہ کرے گا تو وہ بھی اسی طرح فوری طور پر ردعمل دیں گے۔
