سود خور سگے بھائی کی جان کا دشمن بن گیا، بچے فروخت کرنیکی دھمکی

لاہور (خصوصی نامہ نگار)سودکی لعنت ،بڑا بھائی ہی جان کا دشمن بن گیا ،8 سال قبل قرض لیا گیا 1 لاکھ روپے کو تین گنا کرکے بھی اتار دیا مگر اصل رقم بدستور اسی جگہ برقرار سود کی سکت نہ ہونے پر غنڈہ عناصر اور بیوی کی مدد سے مل کر بھابی اور بھتیجوں کو وحشیانہ تشدد کا نشانہ بنا دیا ،ہزارہ کے رہائشی نے سود ادا نہ کرنے پر حقیقی بھابھی اور بچوں کو فروخت کرکے رقم ادا کرنے کیلئے بھائی دھمکی دے دی ،4 ماہ سے داد رسی کیلئے دربدر پھرتا شہری خبریں آفس پہنچ گیا ۔گجر پورہ کے رہائشی شاہ زمان کے مطابق اس نے اپنے حقیقی بڑھے بھائی احمد زمان سے 2009 ءمیں اپنے گھریلو حالات کی خرابی کے باعث ایک لاکھ روپے کا قرض لیا جس پر اس کے بڑھے حقیقی بھائی احمد زمان نے ماہانہ 5 ہزار روپے سود کی شرائط پر پیسے دیتے ہوئے سال 2016 تک سود لیتا رہا تاہم پیسے مزید نہ ہونے پر شاہ زمان نے بھائی سے پیسے معاف کرنے کی بات کی تو بڑا بھائی ہی جان کا دشمن بن گیا شاہ زمان کا کہنا ہے کہ وہ چوہنگ کے علاقہ میں گڈز ٹرانسپورٹ کے اڈا پر محنت مزدوری کرتے ہوئے معمولی تنخواہ لیتا ہے اور یکمشت اپنے بھائی کو قرض لی گئی رقم ادا نہیں کرسکتا مگر اس کی بھابھی اور بھائی آئے روز گھر آکر ذلیل کرتے ہوئے کئی بار ہمیں گھر میں محبوس کردیا گیا تاہم تنگ آکر4 ماہ قبل پولیس کو درخواست دی گئی مگر بھائی کے پولیس اہلکار دوستوں نے مجھے ہراساں کرنا شروع کردیا اور بہانے سے خاندان میں پنچائت لگا لی جہاں مجھے مجبور کردیا گیا کہ پولیس کو دی گئی درخواست کو واپس لے لو جہاں درخواست لیتے ہی پھر سے میری زندگی اجیرن کرڈالی اور آئے روز مجھے پھر سے ہراساں کرنا شروع کردیا اور دو روز قبل پھر سے میری غیر موجودگی میں گھر آکر میری بیوی اور بیٹی سمیت بیٹوں کو تشدد کا نشانہ بنایا گیا میری بیوی کو دھمکی دی گئی کہ اپنے شوہر کو کہوکہ وہ اپنی بیوی اور بچوں کو چاہے فروخت کرکے پیسے ادا کرئے ورنہ تمھارے شوہر کو قتل کرڈالیں گے ،شاہ زمان نے مزید بتایا کہ اس کا بھائی راوی روڈ میں ٹرک اڈا پر مینجر ہے اور پولیس سمیت بااثر افراد سے تعلقات رکھتے ہوئے سود کا کاروبار کر رہا ہے اور کئی افراد کو سود کی رقم دے کر ان سے ماہانہ سود کھاتا ہے ،شاہ زمان کا مزید کہنا تھا کہ وہ انتہائی غریب محنت مزدوری کرنے کا شہری ہے اور وہ سود کی رقم 3 گنا سے بھی زائد ادا کر چکا ہے تاہم وزیر اعلیٰ پنجاب اور چیف جسٹس لاہور ہائیکورٹ سمیت پولیس کے افسران سے اپیل ہے کہ اس کو حقیقی بھائی کے ظلم و ستم سے بچاتے ہوئے قانونی کارروائی کی جائے اور بیوی بچوں سمیت تحفظ فراہم کیا جائے۔