پشاور: (ویب ڈیسک) صدر مملکت ڈاکٹر عارف علوی کی جانب سے صوبوں کے انتخاب کیلئے تاریخ دینے کے معاملے پر پی ڈی ایم کے سربراہ مولانا فضل الرحمان کا ردعمل بھی آ گیا۔
مولانا فضل الرحمان نے اپنے بیان میں کہا کہ آج صدر عارف علوی نے خود کو بادشاہ سلامت اور تحریک انصاف کا ورکر سمجھ کر آئین کو پاؤں تلے روندتے ہوئے اس کی صریحاً خلاف ورزی کی ہے۔
سربراہ پی ڈی ایم مولانا فضل الرحمان نے مزید کہا کہ عارف علوی نے گورنرز اور الیکشن کمیشن کے اختیارات میں مداخلت کی ہے، یہ واضح مس کنڈکٹ ہے اور الیکشن کمیشن اس کو چیلنج کرے۔
واضح رہے صدر مملکت نے الیکشن ایکٹ 2017 ء کے سیکشن 57 ایک کے تحت 9 اپریل بروز اتوار کو پنجاب اور خیبر پختونخوا کی صوبائی اسمبلیوں کیلئے انتخابات کا اعلان کر دیا ہے۔

لاہور: (ویب ڈیسک) لاہور ہائیکورٹ کے دو رکنی بینچ نے تھانہ سنگجانی میں درج مقدمہ میں عمران خان کی حفاظتی ضمانت منظورکرلی، عمران خان پر الیکشن کمیشن کے دفتر کے باہر ہنگامہ آرائی کرنے کے الزام میں مقدمہ درج تھا ۔
اس سے قبل لاہور ہائیکورٹ نے ایس ایس پی سیکیورٹی کو حکم دیا تھا کہ وہ عمران خان کو عدالت میں پیش کریں۔ جسٹس باقر علی نجفی نے عمران خان کی حفاظتی ضمانت کی درخواست کی سماعت کے دوران ریمارکس دیے کہ عمران خان احاطہ عدالت میں موجود ہیں تو پیش کیوں نہیں ہو رہے، انہیں عدالت میں پیش ہونا ہوگا۔ عدالت نے ایس ایس پی سیکیورٹی کو حکم دیا کہ عمران خان کو پانچ منٹ میں عدالت میں پیش کیا جائے۔
اس سے قبل عمران خان کے وکلاءکی جانب سے عدالت کو درخواست کی گئی تھی کہ عمران خان کی حاضری احاطہ عدالت میں ان کی گاڑی میں ہی لگوالی جائے کیونکہ رش کے باعث ان کا کمرہ عدالت میں پیش ہونا ممکن نہیں ۔
خیال رہے کہ الیکشن کمیشن کے دفتر کے باہر ہنگامہ آرائی کرنے کے کیس میں درخواست ضمانت کے معاملے پر لاہور ہائیکورٹ نے عمران خان کو ذاتی حیثیت میں طلب کیا تھا ،تاہم عمران خان عدالت میں پیش نہ ہوئے ، اس موقع پر درخواست ضمانت اور وکالت نامے پر عمران خان کے دستخط مختلف ہونے پر عدالت نے عمران خان کو ذاتی حیثیت میں طلب کرلیا تھا ۔
لاہور ہائیکورٹ کی جانب سے عمران خان کوآج 2بجے کا وقت دیا گیا تھا جسے بڑھا کر پانچ بجے کردیا گیا ۔ عمران خان 5بجے بھی عدالت میں پیش نہ ہوسکے جس کے بعد عدالت مزید 10منٹ کا وقت تھا تاہم عمران خان ساڑھے 6بجے کے بھی بعد عدالت میں پیش ہوگئے ، جہاں کیس کی سماعت جاری ہے ۔
عمران خان عدالت میں پیش ہونے کے لیے قافلے کی صورت میں نکلے جبکہ کارکنوں کی بڑی تعداد ان کے استقبال کے لیے لاہور ہائیکورٹ کے باہر بھی موجود تھی ، جس کی وجہ سے ٹریفک کا نظام شدید متاثر ہوا اور عمران خان کو بھی عدالت میںداخل ہونے میں مشکلات کا سامنا کرنا پڑا ۔
عمران خان کی پیشی کے موقع پر لاہورہائیکورٹ میں سیکیورٹی کے خصوصی انتظامات کیے گئے ہیں جبکہ ویل چیئر کے لیے نیا ٹریک بھی بنایا گیا۔

اسلام آباد: (ویب ڈیسک) وزیر اعظم شہباز شریف سے روتھ چائلڈ اینڈ کمپنی کے وفد نے ملاقات کی۔
اس موقع پر گفتگو کرتے ہوئے وزیر اعظم شہباز شریف نے کہا کہ معیشت کے استحکام کیلئے ٹھوس اور فوری اقدامات لے رہے ہیں، موجودہ حکومت کو سیلاب جیسی قدرتی آفت کا مقابلہ کرنا پڑا، پاکستان کو موسمیاتی تبدیلی کے مضر اثرات کا سامنا ہے۔
وزیر اعظم نے کہا موجودہ حکومت کو گزشتہ حکومت کی بدانتظامی کا بھی سامنا ہے، غیر ضروری درآمدات میں کمی اور برآمدات میں اضافہ حکومت کی اولین ترجیح ہے، تمام مشکلات کے باوجود شبانہ روز محنت سے ملکی معیشت کی بہتری کیلئے کوشاں ہیں۔

اسلام آباد: (ویب ڈیسک) مسلم لیگ (ن) کی سینئر نائب صدر مریم نواز نے کہا ہے کہ پی ٹی آئی کے لوگ مسلم لیگ (ن) میں آنے کے لیے منتیں کر رہے ہیں
تنظیمی اجلاس سے خطاب کرتے ہوئے کہا کہ مہنگائی کی ذمہ دار موجودہ حکومت نہیں، عوام جانتے ہیں کہ معاشی تباہی اور مہنگائی کا عذاب سابق حکومت لائی ہے، چار سال میں جو تباہی مچائی گئی اس سے نجات حاصل کرنے میں چند سال لگیں گے۔
انہوں ںے کہا کہ نوازشریف آئے گا تو سب حالات ٹھیک ہو جائیں گے، ماضی میں بھی ہمیشہ برے حالات میں ملک ملا لیکن نواز شریف اور شہباز شریف نے ہمیشہ ڈلیور کیا اور اب بھی قوم اور ملک کو مسائل سے نکالیں گے۔
مریم نواز کا کہنا تھا کہ پی ٹی آئی کے لوگ مسلم لیگ (ن) میں آنے کے لیے منتیں کر رہے ہیں، عمران خان کے خلاف مقدمات سیاسی انتقام کی بنیاد پر نہیں بنے، مشرق اور مغرب میں سب جانتے ہیں کہ عمران خان نے ٹیریان کے معاملے میں جھوٹ بولا ہے اور ٹیریان والا جھوٹ نہ نگلا جا رہا ہے اور نہ اگلا جا رہا ہے، توشہ خانہ میں عمران خان نے ڈکیتیاں کی ہیں، فارن فنڈنگ میں عمران خان مجرم ثابت ہو چکا ہے۔
انہوں نے کہا کہ تنظیم کو ہر سطح پر فعال بنائیں گے، سوشل میڈیا، خواتین اور یوتھ ونگز کو مزید وسعت دیں گے، خواتین اور نوجوانوں کو آگے لائیں گے، فخر ہے کہ کارکن ہوں اور کارکنوں کے ساتھ ہوں۔

اسلام آباد: (ویب ڈیسک) وفاقی وزیر ماحولیات شیری رحمان کا کہنا ہے کہ صدر عارف علوی کی جانب سے دو صوبائی اسمبلیوں میں انتخابات کی تاریخ کا اعلان غیر آئینی اور غیر قانونی ہے۔
اپنے ایک بیان میں شیری رحمان نے کہا کہ الیکشن ایکٹ 2017 کے آرٹیکل 57 (1) کے مطابق صدر الیکشن کمیشن سے مشاورت کے بعد ہی “عام انتخابات” کی تاریخ کا اعلان کر سکتے ہیں۔ صدر مملکت جلد بازی میں الیکشن ایکٹ 2017 کے آرٹیکل 57 (1) کی بھی خلاف ورزی کر بیٹھے ہیں۔
شیری رحمان کا کہنا تھا کہ آئین کے مطابق صوبائی انتخابات کا اعلان الیکشن کمیشن سے مشاورت کے بعد صوبے کے گورنر نے کرنا ہے، صدر نے نہیں۔ صدر عارف علوی عمران خان کی خوشنودی کی خاطر آئین اور قانون کی دھجیاں اڑا رہے ہیں۔ صدر کو اپنے عہدے اور اختیارات کا احترام کرنا چاہئے۔