کراچی(خصوصی رپورٹ)وزیراعظم کی ممکنہ نااہلی کے سبب مسلم لیگ ن کی ختم ہونے والی سیاست کو بچانے کے لئے مسلم لیگ شہباز (ش) میں تبدیل کرنے پر غور شروع ہوگیا ہے۔ 14اگست جشن یوم آزادی کے موقع پر مسلم لیگ ش گروپ کا اعلان متوقع ہے۔ جس کی سربراہی میاں شہباز شریف کو سونپی جاسکتی ہے۔ انتہائی باخبر ذرائع سے معلوم ہوا ہے کہ وزیراعظم کی ممکنہ نااہلی کے خدشات کے پیش نظر مسلم لیگ ن کی سیاست میں انتہائی ہلچل پیدا ہوگئی ہے اور اس ضمن میں اس بات پر غور کیا جارہا ہے کہ اگر وزیراعظم کو سپریم کورٹ کی طرف سے نااہل قرار دیا جاتا ہے تو اس صورت میں مسلم لیگ ن جو کہ ایک مضبوط اور طاقتور پارٹی بن چکی ہے اس کا سیاسی مستقبل کیا ہوگا اور وزیراعظم کی نااہلی سے پارٹی پر کیا اثرات مرتب ہوں گے۔ ذرائع نے دعویٰ کیا ہے کہ اس سلسلے میں باقاعدہ طور پر گزشتہ تین روز قبل ن لیگ کی قیادت کا ایک اہم اجلاس ہوا جس میں وزیراعظم کی نااہلی کے بعد پارٹی پر پڑنے والے اثرات پر غور کیا گیا۔ہونے والے اس اجلاس میں قیادت میں شامل ایک گروپ کا خیال تھا کہ اگر وزیر اعظم کو نااہل قرار دیا جاتاہے تو اس صورت میں پارٹی کا مستقبل مکمل طور پر تباہ ہو جائے گا اور یہاں تک کہ ن لیگ کی سیاست ہمیشہ ہمیشہ کے لئے ختم ہوجائے گی لہٰذا پارٹی کو بچانے کے لئے فوری طورپر ن لیگ کی سیاست کو ش لیگ کی سیاست میں تبدیل کر دیا جائے گا اور اس کی سربراہی مکمل طور پر میاں شہباز شریف کو سونپ دی جائے گی۔ ذرائع نے بتایا کہ اس حوالے سے پارٹی کی قیادت میں اتفاق رائے بھی قائم ہوگیا ہے مگر قیادت میں شامل نواز شریف کے حامیوں نے اس کی سختی سے مخالفت کرتے ہوئے وزیراعظم کو ایک بار پھر اس بات کا مشورہ دیا ہے کہ وہ ڈٹ جائیں پوری قوم بالخصوص ن لیگ کے کارکنان ان کے شانہ بشانہ جدوجہد کے لئے تیار ہیں۔ ذرائع نے بتایا کہ پارٹی قیادت میں شامل کچھ لوگوں کی مخالفت کے سبب اس بات کاحتمی فیصلہ نہیں کیا جاسکا تاہم خیال ہے کہ ن لیگ کی سیاست کو بچانے کے لئے اسے ش لیگ میں تبدیل کیا جائے گا۔ جس کا اعلان 14 اگست کو ملک کی جشن آزادی کے موقع پر متوقع ہے۔ ذرائع نے یہ بھی بتایا کہ مسلم لیگ ن کی سیاست میں بڑے پیمانے پر بغاوت بھی پھوٹ پڑی ہے جس کے نتیجے میں قیادت میں شامل سینئر رہنماﺅں جن میں وزیر داخلہ چودھری نثار حسین و دیگر اہم رہنما میاں شہباز شریف کی حمایت میں ہیں جبکہ قیادت میں شامل بعض وزراءاور رہنما اب بھی نواز شریف کے ساتھ ہیں۔ ادھر وزیراعظم میاں نوازشریف کے ممکنہ نااہلی اور شہباز شریف کو پارٹی قیادت سونپے جانے کے حوالے سے ملک بھر میں قیاس آرائیوں کا سلسلہ بھی روز بروز زور پکڑ رہا ہے اور اس سلسلے میں گیلپ پاکستان کی جانب سے جاری سروے کے مطابق 51 فیصد پاکستانی وزیراعظم نواز شریف کے حق میں ہیں جبکہ 59 فیصد میاں شہباز شریف کی حمایت کررہے ہیں اور ان کا کہنا یہ ہے کہ وزیراعظم نواز شریف کی ممکنہ نااہلی کے بعد میاں شہباز شریف کو متبادل وزیراعظم کے طور پر آگے لایا جائے اور پارٹی کی قیادت بھی ان کے سپرد کی جائے۔
