( ویب ڈیسک ) نیویارک میں ہونے والے 45 ویں بین الاقوامی ایمی ایوارڈز شو 2017 میں دنیا بھر سے آئے ہوئے ستاروں کی بڑی تعداد نے شرکت کی۔رنگا رنگ ایوارڈ شو میں ریڈ کارپٹ پر ستاروں کی آمد نے میلہ لوٹ لیا جنہوں نے تقریب میں خوب جلوے بکھیرے۔ ایوارڈ شو کی میزبانی کے فرائض نامور کامیڈین ماز جوبرانی نے نبھائے۔ایمی ایوارڈز میں بہترین اداکار کا ایوارڈ سوئیڈش ٹی وی سیریز ‘والینڈر’ میں مرکزی کردار ادا کرنے والے کینتھ برناگھ کو دیا گیا جب کہ بہترین اداکارہ کا ایوارڈ برطانوی ٹی وی سیریز ‘مارسلا’ میں مرکزی کردار نبھانے والی اینا فرائل نے جیتا۔بہترین کامیڈی پروگرام کا ایوارڈ برطانیہ کے شو ‘الان پارٹرج’ کے سیزرڈ شو کو دیا گیا اور بہترین ڈرامہ سیریز کا ایوارڈ ناروے کے ‘مامون 2’ کے نام رہا جب کہ بہترین ڈاکیومینٹری کا ایوارڈ برطانیہ کی ‘ایکسوڈس: آور جرنی ٹو یورپ’ نامی ڈاکیو مینٹری نے جیتا۔تقریب میں بہترین ورائٹی سیریز رائٹنگ، بہترین کامیڈی سیریز ڈائیریکٹر، ڈرامہ سیریز کی بہترین اداکارہ و اداکار، بہترین معاون اداکارہ و اداکار سمیت دیگر کئی شعبوں میں ایوارڈز دیئے گئے۔ایوارڈ شو میں ستاروں کی دلکش پرفارمنس اور جھل مل کرتے ملبوسات نے چار چاند لگا دیئے۔
