گوادر‘ کوئٹہ‘ مکران (نمائندگان‘مانیٹرنگ ڈیسک) گوادر کے علاقے پشگان اور گنت میں نامعلوم مسلح افراد نے بے گناہ مزدوروں پر اندھا دھندفائرنگ کردی جس کے نتیجے میں 10 مزدور جاں بحق جبکہ 5 شدید زخمی ہوگئے۔ جنہیں فرنٹیئر کور نے طبی امداد فراہم کرنے کیلئے گوادرمنتقل کردیا۔ جاںبحق ہونےوالوں کی شناخت ہوگئی جن کا تعلق سندھ کے علاقے نوشہرہ فیروز سے ہے ،وزیراعلیٰ بلوچستان اور صوبائی وزیر داخلہ نے گوادرمیں مزدوروں پر فائرنگ کے واقعہ کی مذمت کرتے ہوئے کہاہے کہ نہتے اور بے گناہ مزدوروں کو نشانہ بنانے والے دہشت گردوں کو کیفرکردارتک پہنچا کر دم لیںگے ۔کمشنر مکران ڈویژن بشیر بنگلزئی کے مطابق گزشتہ روز ضلع گوادرکے علاقے پشکان اورگنت میں تعمیراتی کام میں مصروف مزدوروں پر مسلح موٹرسائیکل سواروں نے اندھادھند فائرنگ کردی جس کے نتیجے میں دونوں واقعات میں 10مزدور جاںبحق جبکہ 2زخمی ہوگئے ہیں ،جاںبحق ہونے والوں میں سے 9مزدوروں کی شناخت محمد خان،علی دوست،شعبان ،عبدالحکیم ،رسول بخش،وحید،ظہیر، صدام،آصف کے نام سے جن کا تعلق صوبہ سندھ کے نوشہرہ فیروز علاقے سے ہیں جن کی لاشوں کو ضابطے کی کارروائی کیلئے ڈسٹرکٹ ہیڈکوارٹر ہسپتال منتقل کردیاگیاہے واقعہ کے بعد ملزمان فرارہونے میں کامیاب ہوگئے ہیں تاہم کمشنر مکران ڈویژن بشیر بنگلزئی کے مطابق فائرنگ کا یہ واقعہ گوادر کے علاقے پشکان اور گنت میں پیش آیاہے ،حملہ آوروں کی تلاش کیلئے سیکورٹی فورسز نے علاقے میں سرچ آپریشن شروع کردیاہے ،واقعہ کے عینی شاہد قادر بخش کے مطابق دو حملہ آور پشکان کی جانب سے آئے جنہیں دیکھ کر میں اٹھ گیا اوربلوچی میں ان کے ساتھ بات کی تو انہوں نے مجھے کہاکہ آپ سائیڈ پر ہوجاﺅ اس کے بعد مزدوروں کو اکھٹا کرکے گولیاں ماری گئی حالانکہ میں نے انہیں بتابھی دیا کہ ان مزدوروں کا تعلق سندھ سے ہے ،انہوں نے کہاکہ وہ ڈیڑھ سال سے یہاں کام کررہے ہیں ، ان کیلئے پہلے سیکورٹی تھی نہ ہی اب ہے ۔دریںاثناءجاںبحق ہونے والے مزدوروں کی نماز جنازہ 3بجے سینیٹر مرحوم اسحاق کرکٹ گراﺅنڈ میں 3بجے ادا کی جارہی ہے جس میں کورکمانڈر عامرریاض کی شرکت بھی متوقع ہے ۔ایدھی ذرائع کے مطابق ایدھی فاﺅنڈیشن کے سربراہ فیصل ایدھی موبائل سرد خانے گاڑیوں کے ہمراہ لاشوں کو لینے کراچی سے گوادر روانہ ہوگئے،لاشون کو گوادر سے کراچی پہنچایا جائیگا جہاں سے ان کو آبائی گاﺅں روانہ کیا جائیگا،واقعے کے بعد گوادر میں سیکیورٹی سخت کردی گئی ہے ،واقعہ کے فوری بعد داخلی و خارجی راستوں کی ناکہ بندی کرکے ملزمان کی تلاش شروع کردی گئی ہے۔وزیراعلیٰ بلوچستان نواب ثناءاللہ زہری نے گوادر میں مزدورو ں پر نامعلوم مسلح افراد کی فائرنگ اور اس میں 10مزدوروں کی ہلاکت کے واقعہ کی مذمت کرتے ہوئے کہاہے کہ دہشت گردی کی اس بہیمانہ واقعہ میں غریب اور بے گناہ محنت کشوں کو نشانہ بنایاگیاہے جو دہشت گردوں کی بزدلی کا واضح ثبوت ہے ،انہوں نے کہاکہ بزدل دہشت گردوں نے پھر چھپکے سے وار کیا ہے وہ بھی اپنے غیر ملکی آقاﺅں کی اشاروں پر ،انہوں نے کہاکہ اس سے بڑاظلم اور کیا ہوسکتاہے کہ لوگ دوسروں کی اشاروں پر اپنے ہی لوگوں کو نشانہ بنائے ،انہوں نے کہاکہ دہشت گردوں کو ان کے بلوں میں نشانہ بنا کر عبرتناک سزا دیںگے ،انہوں نے کہاکہ گوادر کی ترقی کے خلاف ہر ناپاک سازش کو ناکام بنایاجائےگا اور کسی کا بھی گوادر کی ترقی روکنے کا ارمان پورانہیں ہوگا،انہوں نے واقعہ میں ملوث دہشت گردوں کی فوری گرفتاری کی ہدایت کی اورجاںبحق اور زخمی ہونےوالے مزدوروں کے اہلخانہ سے تعزیت بھی کی ۔علاوہ ازیں صوبائی وزیر داخلہ میر سرفرازبگٹی نے واقعہ کے بعد بات چیت کرتے ہوئے کہاہے کہ دہشتگر دی میں بھار تی خفیہ ایجنسی را ملوث ہے۔ بلوچستان میں ترقی شرپسندوں کی آنکھ میں کھٹکنے لگی،دہشت گردوں کی بزدلانہ کاروائیاں بلوچستان میں ترقی کا سفر نہیں روک سکتیں،انہوں نے کہاکہ بلوچستان میں ترقی ملک دشمنوں کو نہیں بھارہی ہے،کل مستونگ میں دھماکا کر کے معصوم انسانوں کا خون بہایا آج گوادر میں مزدوروں سے جینے کا حق چھین لیا،لیویز حکام کے مطابق یہ افسوس ناک واقعہ گوادار کے علاقے پشکان اور گنت میں پیش آیا جب مزدور پشکان گنز روڈ پر کام کر رہے تھے،اس دوران شرپسندوں نے فائرنگ کردی،فائرنگ کے نتیجے میں 10 مزدور جاں بحق اور دو زخمی ہوئے،انہوں نے کہاکہ نہتے اور بے گناہوں کو نشانہ بنا کر دہشت گردوں نے اپنی بزدلی اور کمزوری ظاہر کی،دہشت گردوں کی بزدلانہ کاروائیاں بلوچستان میں ترقی کا سفر نہیں روک سکتیں،واقعہ میں ملوث عناصر کی گردنیں دبوچ لیں گے،علاوہ ازیں وزیراعلی پنجاب شہبازشریف،امیر جماعت اسلامی سراج الحق سمیت دیگر سیاسی جماعتوں کے گوادر میں مزدووں کے قتل کی مذمت کی۔ وزیراعظم محمدنوازشریف نے گوادر کے علاقہ پشگن میں معصوم محنت کشوں پر فائرنگ کے واقعہ کی مذمت کرتے ہوئے متعلقہ وفاقی اور صوبائی سطح کے حکام کو ہدایت کی ہے کہ اس واقعہ میں ملوث شرپسندوں کو کیفر کردار تک پہنچایا جائے۔ وزیراعلیٰ بلوچستان نواب ثناءاللہ خان زہری نے گوادر میں مزدوروں پر فائرنگ کے واقعہ کی مذمت کی ہے۔ وزیرداخلہ بلوچستان سرفراز بگٹی نے گوادر میں مزدوروں کے قتل کی مذمت کرتے ہوئے کہا ہے کہ نہتے اور بے گناہ لوگوں کو نشانہ بنا کر دہشت گردوں نے اپنی بزدلی اور کمزوری ظاہر کی ہے۔ اپنے جاری کردہ بیان میں وزیرداخلہ بلوچستاننے کاہ کہ وقعہ میں ملوث عناصر کو کیفر کردار تک پہنچانے کیلئے تمام وسائل بروئے کار لائیں گے۔سدرن کمانڈ ہیڈکوارٹرز میں اعلیٰ سطح کا مشاورتی اجلاس طلب کیا گیا جس میں صوبائی سول و کمانڈر سدرن کمانڈ سمیت فوجی قیادت نے بھی شرکت کی اور صوبے کو درپیش چیلنجز پر تبادلہ خیال کیا گیا۔ پاک فوج کے شعبہ برائے تعلقات عامہ (آئی ایس پی آر) کے مطابق اجلاس میں صوبائی وزیرداخلہ سرفراز بگٹی ‘ چیف سیکرٹری ‘ ایڈیشنل آئیجی نے شرکت کی۔ اجلاس میں صوبے کی سکیورٹی کی صورتحال کا جائزہ‘ صوبے کو درپیش چیلنجز پر تبادلہ خیال کیا گیا۔ اجلاس کے شرکاءنے اس موقع پر صوبے میں پائیدار امن اور استحکام لانے کے عزم کا بھی اظہار کیا جبکہ شرکاءنے اجلاس میں مستونگ اور گوادر واقعات کے شہداءکیلئے فاتحہ خوانی بھی کی۔ کمانڈر سدرن کمانڈ لیفٹیننٹ جنرل عامر ریاض گوادر روانہ ہوگئے ہیں جہاں وہ مزدوروں کی نمازجنازہ میں شرکت کریں گے۔

راولپنڈی (بیورورپورٹ) آرمی چیف جنرل قمر جاوید باجوہ نے ایل او سی پر نکیال سیکٹر کا دورہ کیا ہے۔آئی ایس پی آرکے مطابق آر چیف کو مقامی کمانڈر نے ایل او سی کی صورتحال پر بریفنگ دی۔ اس موقع پرآرمی چیف نے سیزفائر کی بھارتی خلاف ورزیوں کا مو¿ثر جواب دینے پر جوانوں کو سراہا جبکہ آپریشنل تیاریوں پر بے حد تعریف کی۔آئی ایس پی آرکے مطابق آرمی چیف شہید لیفٹیننٹ خاور کے والدین سے تعزیت کے لیے ان کے گھر بھی گئے اور مادر وطن کے لیے لیفٹیننٹ خاور کی عظیم قربانی کو سراہا۔ ڈی جی آئی ایس پی آر میجر جنرل آصف غفور نے کہا کہ بھارت لائن آف کنٹرول پر اشتعال انگیزی سے باز رہے، پاک فوج اپنے دفاع سے پوری طرح واقف ہے، بھارت کو کسی بھی مہم جوئی کا خمیازہ بھگتنا پڑے گا۔ پاک فوج کے شعبہ تعلقات عامہ (آئی ایس پی آر ) سے جاری ایک بیان میں ڈی جی آئی ایس پی آر میجر جنرل آصف غفور نے کہا کہ بھارت لائن آف کنٹرول کے دونوں جانب شہری آبادی کو نشانہ بنا رہا ہے۔ بھارت سیز فائر معاہدے کی خلاف ورزی کر رہا ہے، بھارتی فوج کی مہم جوئی کا بھرپور جواب دیا جائے گا۔ اس مہم جوئی کے نتائج غیر ارادی ہوں گے بھارت نتائج بھگتنے کے لئے تیار رہے۔ واضح رہے کہ آج چیف آف آرمی سٹاف جنرل قمر جاوید باجوہ نے لائن آف کنٹرول پر اگلے مورچوں کا دورہ کیا تھا ،جہاں انہیں لائن آف کنٹرول کی تازہ ترین صورت حال پر بریفنگ دی گئی تھی۔ اس موقع پر انہوں نے ملک کے دفاع کے لئے بھرپور کارکردگی دکھانے والے پاک فوج کے جوانوں کے حوصلے اور جذبے کو خراج تحسین پیش کیا تھا۔

پشاور(این این آئی‘مانیٹرنگ) پاکستان پیپلزپارٹی کے شریک چیئرمین اورسابق صدرآصف علی زرداری نے کہا ہے کہ حکومت سے تین بارڈر نہیں سبنھالے جاتے،ن لیگ فاٹا کے بارے میں مخلص نہیں، عوام کو ٹیکس کے ذریعے لوٹ لیا گیا،حکمران صرف گورنر رول کھناچاہتے ہیں۔پشاورکے دورے کے موقع پر پارٹی کے صوبائی صدر ہمایون خان کی رہائش گاہ پر خطاب میں آصف علی زرداری کا کہنا تھا کہ تین بارڈر حکومت سے نہیں سنبھالے جارہے،ہمارے وقت میں سب کے ساتھ بہتر تعلقات تھے،اکانومی کم سے کم ہوتی جارہی ہے،ہمارے وقت میں بجلی کے نرخ کم تھے،عوام کو ٹیکس کے ذریعے لوٹ لیا گیا،حکمران صرف گورنر رول رکھناچاہتے ہیں،انہوں نے کہا کہ بنی بنائی سڑکوں پر پیسے خرچ کرنے کی بجائے فاٹا پرخرچ کیے جائیں،وہاں ایم پی ایز بنائیں جوترقیاتی کام کریں،آصف علی زرداری کا کہنا تھا کہ ن لیگ فاٹا کے بارے میں مخلص نہیں،فاٹا میں گورنررولزلاکرخیبرپختونخوا پراپنی حکومت قائم کرنا چاہتے ہیں،انہوں نے حکومت کو مزید تنقید کا نشانہ بناتے ہوئے کہا کہ تھر سے کوئلہ نکال کر ساہیوال لاکر وہاں کی زمین بھی خراب کرتے ہیں،میری نظر میں اگر صوبے مضبوط ہیں تو فیڈریشن مضبوط ہے،ن لیگ کی نظر میں اگر اسلام آباد مضبوط ہءتو ملک مضبوط ہے،پاکستان بنا جمہوریت سے ہے اور جمہوری رہے گا،ہمیشہ آمریت سے مقابلہ کیا ہے،وارننگ دیتا ہوں کہ اس دفعہ کارکن انتخابات میں پولنگ سٹیشن پر بیٹھیں رہینگے ۔نظر بھی رکھیں گے اور ووٹ بھی لے کر جائینگے،شفاف انتخابات نہیں ہونگے تو کورٹ جائینگے، تین دن کے لئے آیا ہوں لیکن چار دن قیام کرونگا،مجھے گرمی یا سردی نہیں لگتی۔ پشاور میں کارکنوں سے خطاب کرتے ہوئے انہوں نے مزید کہا کہ غیر جانبدار اور شفاف الیکشن چاہتے ہیں، جمہوریت کی خاطر آر او الیکشن قبول کیا۔آصف زرداری کا کہنا ہے کہ الیکشن میں صرف آٹھ، نوماہ رہ گئے ہیں،الیکشن ہم نے جیتنا ہے، حکومت سے 3بارڈر سنبھالے نہیں جا رہے۔انہوں نے کہا کہ غیرجمہوری قوتوں سے جنگ جاری رہے گی، پاکستان پر اس وقت مغل بادشاہ حکومت کر رہا ہے، بادشاہ سلامت سے حساب لیں گے۔سابق صدر آصف علی زرداری پشاور میں اے این پی کے مرحوم رہنما حاجی عدیل کے گھر بھی گئے جہاں انہوں نے حاجی عدیل کے اہل خانہ سے تعزیت کی ہے۔الیکشن میں 8 یا 9 ماہ باقی رہ گئے ہیں اور اگر حکومت نے ایک ہفتے کے اندر انتخابی اصلاحات نہ کیں تو عدالت جائیں گے۔ ان کا کہنا تھا کہ پیپلز پارٹی کی غیر جمہوری قوتوں سے جنگ جاری رہے گی۔