ہاکی فیڈریشن میں کوئی کرپشن نہیں ہوئی،خالدکھوکھر

اسلام آباد(اے پی پی) پاکستان ہاکی فیڈریشن کے صدر بریگیڈیئر ریٹائرڈ خالد سجاد کھوکھر نے کہا ہے کہ فیڈریشن کے خلاف منفی پروپیگنڈہ کرنے والوں کو کچھ حاصل نہیں ہوگا۔ انہوں نے کہا کہ فیڈریشن میں کوئی کرپشن نہیں ہوئی ہے۔ ان خیالات کا اظہار انہوں نے گذشتہ روز اپنی رہائشگاہ پر پاکستان ہاکی فیڈریشن کے سیکرٹری جنرل شہباز احمد سنیئر اور فنانس سیکرٹری اخلاق عثمانی کے ہمراہ صحافیوں سے گفتگو کرتے ہوئے کیا۔ انہوں نے کہا کہ فیڈریشن کے خلاف کچھ لوگ پہلے دن سے ہی سازشیں تیارکر رہے ہیں لیکن ان کو ابھی تک ان سازشوں سے کچھ حاصل نہیں ہوا۔ انہوں نے کہا کہ ہم سب ملک میں ہاکی کی بحالی چاہتے ہیں اس کے علاوہ کوئی اور بات نہیں ہے۔ انہوں نے کہا کہ میں منتخب صدر ہوں، استعفی نہیں دوں گا اور نہ ہی مجھ سے کوئی استعفی لے سکتا ہے۔ ملک ہاکی کی ترقی کےلئے پاکستان ہاکی فیڈریشن کے صدر بریگیڈیئر ریٹائرڈ سجاد کھوکھر نے سنیئر صحافی ناصر اسلم راجہ کی خواہش پر سینئر صحافی عبدالمحی شاہ کی سربراہی میں صحافیوں پر مشتمل کمیٹی تشکیل دی۔ یہ کمیٹی ملک میں ہاکی کی ترقی اور بہتری کےلئے اپنی اپنی تجاویز دے گی۔ ایک سوال کے جواب میں انہوں نے کہا کہ فیڈریشن کے پاس کوئی اپنا سٹیڈیم نہیں ہے اور نہ ہی بنیادی ڈھانچہ موجود ہے اس سلسلہ میں پاکستان سپورٹس بورڈ بھی تعاون اور سہولیات فراہم نہیں کر رہا۔ ایک اور سوال کے جواب میں انہوں نے کہا کہ نومبر 2017ءسے حکومت کی طرف سے کوئی گرانٹ فراہم نہیں کی۔ انہوں نے کہا کہ حکومت اور سپانسر کے بغیر کوئی بھی کھیل ترقی نہیں کر سکتا۔ انہوں نے کہا کہ ہم حکومت سے خود رقم نہیں مانگتے بلکہ حکومت رقم کو خود کھلاڑیوں پر خرچ کرے۔ انہوں نے کہا کہ ہماری کوششوں سے کھلاڑیوں کو ملازمتیں مل گئیں۔ ایک اور سوال کے جواب میں انہوں نے کہا کہ ملکی تاریخ میں پہلی بار فیڈریشن نے انڈر-16 سکول ہاکی چیمپئن شپ خیرپور میں منعقد کروائی اور اب فیڈریشن کے زیراہتمام قومی انڈر-19 ہاکی چیمپئن شپ شہناز شیخ ہاکی سٹیڈیم راولپنڈی میں جاری بے جس میں چودہ ٹیمیں حصہ لے رہی ہیں۔