لاہور(شوبز ڈیسک ) فلم مولا جٹ کے نام کا تنازع حل نہ ہو سکا ۔انلیکچوئل پراپرٹی ٹربیونل کے روبرو ” دی لیجنڈ آف مولا جٹ کے پروڈیوسر بلال لاشاری ‘ عمارہ حکمت اور رائٹر ناصر ادیب کو اصالتاَ آج طلب کر لیا ہے یہ آرڈر جسٹس منیر احمد جوئیہ نے جاری کیا ۔آرڈر میں تینوں سنسر بورڈز کے چئیرمینوں کو بھی طلب کیا گیا ہے۔ واضح رہے کہ عدالت نے نوٹس جاری کیا تھا کہ لیجنڈ آف مولا جٹ کے پروڈیوسر مولا جٹ کا نام استعمال نہیں کر سکتے اور نہ ہی اس نام سے فلم کی نمائش کر سکتے ہیں۔ اور اسی حوالے سے عدالت نے مزکورہ افراد کو طلب کیا ہے۔ مولا جٹ آج سے چالیس سال پہلے پروڈیوسر محمد سرور بھٹی نے ریلیز کی تھی جس کی شہرت کا ڈنکا ابھی تک بج رہا ہے اور اسی وجہ سے اس کلاسک فلم کا پارٹ ٹو بنانے کا ارادہ بلال لاشاری نے کیا تاہم دونوں پروڈیوسرز میں ٹھن گئی اور معاملات کورٹ تک پہنچ گئے ۔موجودہ عدالتی صورتحال سے واضح ہے کہ فلم عید پر ریلیز نہیں ہو گی۔
