ن لیگ نے میڈیا انڈسٹری کو اشتہارات کے اربوں ادا نہیں کیئے، فیاض چوہان

لاہور (لیڈی رپورٹر) وزیرِ اطلاعات پنجاب فیاض الحسن چوہان نے صدر مسلم لیگ (ن) میاں شہباز شریف کی جانب سے میڈیا انڈسٹری کو بلا سود قرضے اور دیگر مراعات دینے کے مطالبے پر اپنے ردعمل میں کہا ہے کہ( ن) لیگ نے اپنے دورِ اقتدار میں شریف برادران سمیت شریف خاندان کی ذاتی تشہیر کے لیے دیئے گئے اشتہارات کی مد میں میڈیا انڈسٹری کے اربوں روپے ادا نہیں کئے۔ پاکستان تحریکِ انصاف نے وزیرِ اعظم عمران خان کی خصوصی ہدایات پر پی ٹی آئی کے خلاف استعمال ہونے کے باوجود ان اشتہارات کے اربوں روپے کے بقایا جات میڈیا ہا¶سز کو ادا کئے گئے۔ فیاض الحسن چوہان نے کہا کہ اشتہارات کی مد میں بقایا جات کی ادائیگی کا یہ فیصلہ وزیراعظم عمران خان کی میڈیا دوستی کا منہ بولتا ثبوت ہے۔ اس موقع پر وزیر اطلاعات نے یہ بھی کہا کہ بزدار حکومت کی جانب سے دو دن پہلے شروع کیا جانے والا خصوصی ریلیف پیکج برائے میڈیا نمائندگان وزیرِ اعظم عمران خان اور وزیرِ اعلیٰ پنجاب سردار عثمان بزدار کے ویژن کے عین مطابق ہے۔ فیاض الحسن چوہان نے مزید کہا کہ حکومت میڈیا کو اشتہارات کی مد میں سولہ فیصد صوبائی ٹیکس سے استثنیٰ دیے جانے اور اشتہارات کی ادائیگیاں روزانہ کی بنیادوں پر کرنے پر غور کر رہی ہے۔ فیاض الحسن چوہان نے کہا کہ حکومت میڈیا ہا¶سز کے مالکان سے لیکر کارکنان تک سب کے ساتھ شانہ بشانہ کھڑی ہے اور وزیرِ اعظم عمران خان کی قیادت میں ہم میڈیا کو ہر طرح کی سہولت دینے کیلئے موجود ہیں۔