واشنگٹن ویب ڈیسک : امریکا نے ریاست ٹیکساس کے شہر ہیوسٹن میں قائم چینی قونصل خانہ بند کرنے کا حکم دے دیا، چین نے امریکی فیصلے کی شدید الفاظ میں مذمت کی ہے۔
غیرملکی خبررساں ادارے کی رپورٹ کے مطابق چینی وزارت خارجہ نے شدید برہمی کا اظہار کرتے ہوئے کہا کہ چین امریکا کے غیرمنصفانہ اور اشتعال انگیز اقدام کی مذمت کرتا ہے۔
چینی وزارت خارجہ کے مطابق امریکا کی جانب سے چینی قونصل خانہ بندکرنے کا فیصلہ یکطرفہ ہے، امریکا نے غلط فیصلے کو واپس نہ لیا تو بیجنگ بھرپور انداز میں جواب دے گا۔
چین نے خبردار کیا کہ امریکا کا سفارتی مشن بھی چین میں موجود ہے اور یہاں پر امریکی عملہ بھی کام کر رہا ہے، اگر امریکی اس منفی راستے پر گامزن ہونے پر تلا ہوا ہے تو ہم بھر پور جواب دیں گے۔
خیال رہے کہ امریکا نے چین کو ہیوسٹن میں قونصل خانہ بند کرنے کے لیے 72 گھنٹے دیے ہیں۔ تاہم اب تک یہ واضح نہیں ہوسکا کہ ٹرمپ انتظامیہ نے چینی قونصل خانہ بند کرنے کا حکم کیوں دیا ہے۔
