دبئی (ویب ڈیسک) متحدہ عرب امارات میں کورونا وائرس کی وبا پھیلنے کے بعد سینی ٹائرزر اور فیس ماسک کی طلب میں بے پناہ اضافہ ہو گیا ہے۔ ان اشیاءکی طلب اور لوگوں کی مجبوری کا فائدہ اٹھاتے ہوئے کئی فارمیسیز نے ماسک اور سینی ٹائزر انتہائی مہنگے داموں فروخت کرنا شروع کر دیئے ہیں۔ تاہم دبئی کے حکام نے ان گراں فروشوں کے خلاف کارروائیاں شروع کر دی ہیں۔ دبئی میں حکام نے تین دواخانوں کو چہرے کے ماسک اور سینی ٹائزر مہنگے داموں فروخت کرنے پر جرمانے عائد کیے ہیں۔ دبئی اکانومی کے شعبہ تحفظ صارفین (سی سی سی پی) نے الجمائرہ ،الخوانیج اور مردیف میں تین فارمیسیوں کو چہرے کے ماسک اور سینی ٹائزر کی قیمتوں میں ردوبدل کرنے پر جرمانے عاید کیے گئے ہیں۔ان میں سے دو فارمیسیوں نے چہرے کے ماسک کی قیمت کو از خود بڑھا لیا تھا اور تیسرا دوا خانہ سینی ٹائزر کو زیادہ قیمت پر فروخت کررہا ہے۔بہت سے صارفین نے حکام کو ان اشیاءکو مہنگے داموں فروخت کرنے کی شکایت کی تھی۔سی سی سی پی نے اپنے بیان میں مزید کہا ہے کہ اگر ان دوا خانوں نے دوبارہ ان اشیاءکو مہنگے داموں فروخت کیا تو ان پر دگنا جرمانہ عاید کیا جائے گا اور انھیں بند بھی کیا جاسکتا ہے۔دبئی اکانومی نے ملک میں کاروبار کرنے والے تمام اداروں پر زوردیا ہے کہ وہ چہرے کے ماسک ، سینی ٹائزر اور جراثیم کش اشیاءکو مہنگے داموں فروخت کرنے سے گریز کریں۔اس نے دواخانوں اور طبی سامان مہیا کرنے والوں سے کہا ہے کہ وہ اپنی سماجی ذمے داری کا احساس کرتے ہوئے جراثیم کش اشیاءکی قیمتوں میں ازخود ہی کمی کریں۔

ابوظہبی (ویب ڈیسک) ولی عہد کا پاکستانیوں اور دیگر غیر ملکیوں کے نام خصوصی پیغام، شیخ محمد بن زاید کہتے ہیں: آپ کو امارات کا قومی ترانہ پڑھتا دیکھ کر میری آنکھوں میں آنسو آگئے، آپ کسی طرح بھی اس ملک کے شہریوں سے کم تر نہیں، اللہ آپ سب کی حفاظت کرے، انشاءاللہ ہم جلد ان مشکل حالات سے باہر نکل جائیں گے۔اماراتی ولی عہد شیخ محمد بن زاید کی جانب سے متحدہ عرب امارات میں مقیم غیر ملکیوں کے نام خصوصی پیغام جاری کیا گیا ہے۔اپنے پیغام میں شیخ محمد بن زاید نے امارات میں مقم غیر ملکیوں کا خصوصی شکریہ ادا کیا ہے۔ ان کا کہنا ہے کہ انہوں نے حال ہی میں غیر ملکیوں کی جانب سے امارات کا قومی ترانہ پڑھنا کی ایک ویڈیو دیکھی ہے۔میں نے دیکھا کہ لاک ڈاون کے باعث اپنے گھروں میں محصور غیر ملکی کیسے گھروں کی بالکنی میں آگئے اور پھر انہوں نے مل کر امارات کا قومی ترانہ پڑھا۔ شیخ محمد بن زاید کہتے ہیں کہ یہ ویڈیو دیکھ کر ان کی آنکھوں میں آنسو آگئے۔ وہ امارات کے غیر ملکی رہائشیوں کا بتانا چاہتے ہیں کہ وہ کسی طور پر اماراتی شہریوں سے کم تر نہیں ہیں۔ غیر ملکی رہائشی امارات کیساتھ ویسے ہی وفادار ہیں جیسے امارات کے اپنے شہری۔میری دعا ہے اللہ آپ سب کی حفاظت کرے، اور انشاءاللہ ہم سب اس مشکل وقت سے جلد چھٹکارا حاصل کر لیں گے۔ اماراتی ولی عہد کے اس پیغام کو سوشل میڈیا پر کافی پذیرائی حاصل ہوئی ہے۔ یہاں واضح رہے کہ متحدہ عرب امارات کرونا وائرس کے پھیلاو کے باعث اس وقت لاک ڈاون کی حالت میں ہے۔ امارات میں اب تک کرونا وائرس کے 664 کیسز سامنے آ چکے، جبکہ 6 مریض جاں بحق ہوئے۔

ریاض(ویب ڈیسک) سعودی وزیر حج و عمرہ ڈاکٹر محمد صالح بن طاہر بنتن نے کورونا وائرس کی وجہ سے پیدا ہونے والی غیر یقینی صورتحال کے باعث مسلمانوں سے حج کی تیاریاں موخر کرنے کا کہا ہے۔سعودی وزیر حج و عمرہ ڈاکٹر محمد صالح بن طاہر بنتن نے سرکاری ٹی وی الاخباریہ سے گفتگو کرتے ہوئے کہا کہ سعودی عرب حج و عمرہ زائرین کی خدمت کے لیے پوری طرح تیار ہے اور سعودی حکومت عازمین عمرہ کو کسی بھی وقت آنے کی اجازت دے سکتی ہے۔ڈاکٹر محمد صالح بن طاہر بنتن نے کہا کہ کورونا وائرس کے باعث موجودہ حالات کے پیش نظر سعودی حکومت مسلمانوں اور اپنے شہریوں کی صحت و تندرستی کے حوالے سے فکرمند ہے، اس لیے ہم دنیا بھر میں اپنے مسلمان بھائیوں سے کہتے ہیں کہ صورتحال واضح ہونے کا انتظار کریں اور حج معاہدے نہ کریں۔سعودی حکومت نے پاکستان سمیت تمام مسلم ممالک کی حکومتوں کو حج معاہدے کرنے سے روک دیا ہے جبکہ رواں سال کے شروع میں عمرے کو بھی معطل کردیا ہے اور اس سال حج بھی موقوف ہونے کا خدشہ ہے۔سعودی عرب میں کورونا وائرس کے 1500 سے زائد کیسز سامنے آچکے ہیں اور 10 افراد ہلاک ہوچکے ہیں۔ حکومت نے ملک میں لاک ڈاون کردیا ہے اور تمام غیر ملکی پروازیں بھی معطل کردی گئی ہیں۔ گزشتہ سال دنیا بھر سے 25 لاکھ حاجیوں نے حج کے مقدس فریضے کی ادائیگی کے لیے سعودی عرب کا سفر کیا تھا۔

نیویارک(ویب ڈیسک) اقوام متحدہ نے کورونا وبا کے پیش نظر غریب ممالک کے لیے عالمی فنڈ قائم کرنے کا اعلان کیا ہے۔اقوام متحدہ کے سیکرٹری جنرل انتونیو گوتریس نے کورونا کے تباہ کن سماجی و معاشی اثرات کو دور کرنے کے منصوبے کا آغازکردیا۔ منصوبے میں کم اور درمیانی آمدنی والے ممالک کے لیےعالمی فنڈ قائم کیا جائے گا۔سیکرٹری جنرل اقوام متحدہ کا اس حوالے سے کہنا ہے کہ کوویڈ 19 اقوام متحدہ کی تشکیل کے بعد سے اب تک کا سب سے بڑا امتحان ہے، کورونا وائرس معاشروں اور لوگوں کی زندگیوں کو نشانہ بنا رہا ہے، جس سے معیشت پر طویل مدتی اثرات ہوں گے جنہیں حل کرنے کے لئے مل کر کام کرنا ہوگا۔ایک رپورٹ کے مطابق کورونا وائرس سے اب تک 33 ہزار 257 اموات ہو چکی ہیں، جب کہ 204 ممالک میں 6 لاکھ 97 ہزار 244 تصدیق شدہ کیسز سامنے آئے ہیں۔ آئی ایم ایف کے اعلان کے بعد یہ رپورٹ سامنے آئی ہے کہ دنیا 2009 کے بعد سے اب تک کے سب سے بدتر بحران کا شکار ہوگئی ہے۔اقوام متحدہ کے مطابق سیکرٹری جنرل نے کم اور درمیانی آمدنی والے ممالک کے لئے رسپانس اینڈ ریکوری فنڈ قائم کیا ہے، جس سے بحران کی شکار حکومتوں کو تیزی سے مدد فراہم کرنے اور ان کی بحالی میں مدد کی جائے گی۔

مکہ المکرمہ(ویب ڈیسک) حرم شریف میں مطاف کے حصے میں طواف کا سلسلہ دوبارہ شروع کرنے کی اجازت دے دی گئی ہے تاہم اس دوران کم لوگوں کا اجتماع ہی طواف کر سکے گا۔کورونا وائرس کی روک تھام کے لیے سعودی حکومت نے 23 مارچ سے 21 روز کے لیے جزوی کرفیو کا اعلان کر رکھا ہے۔اس سے قبل حفاظتی اقدامات کے تحت تمام مساجد بشمول مسجد الحرام اور مسجد نبوی کے اندرونی اور بیرونی حصے میں پنجگانہ نماز اور نماز جمعہ کی ادائیگی پر مکمل پابندی عائد کی جا چکی ہے۔سعودی حکام نے اس سے قبل وائرس سے بچاو? کے لیے خانہ کعبہ کے اطراف سپرے کے لیے مطاف خالی کرایا تھا اور طواف کے عمل کو روک دیا گیا تھا جب کہ بعد میں مطاف کو زائرین کے لیے کھولا گیا تو انہیں کعبہ کے قریب جانے کی اجازت نہیں دی گئی۔