جلد ملک وقوم کے روشن مستقبل کا سفر شروع کریں گے، شہباز شریف
اقتدار میں آکر قوم کو مہنگائی، بےروزگاری سے نجات دلائیں گے، زراعت، کسان اور صنعت پھر پھلیں پھولیں گے، آج پورے پاکستان سے ڈسکہ کے فیصلے کی آواز آرہی ہے۔ صدرمسلم لیگ ن کا ڈسکہ الیکشن میں کامیابی پر اظہار تشکر
انہوں نے کہا کہ انشاءاللہ، نوازشریف کی قیادت میں مسلم لیگ (ن) اقتدار میں آکر قوم کو ایک بار پھر مہنگائی، بے روزگاری کے مصائب سے نجات دلائے گی۔
غریبوں کے چولہے پھر جلیں گے، زراعت اور کسان پھر پھلیں پھولیں گے، صنعت کا پہیہ پھر رواں ہوگا۔ عوام اور کارکنان حوصلے بلند رکھیں،ان کی محنت رنگ لارہی ہے۔ انشاءاللہ، ملک و قوم کی ترقی، خوشحالی اور روشن مستقبل کا چھین لیا جانے والا سفر پھر اسی جذبے سے شروع کریں گے۔واضح رہے مسلم لیگ ن نے این اے 75 ڈسکہ ضمنی الیکشن جیت لیا ہے۔ 360 پولنگ اسٹیشنز کے غیر سرکاری غیر حتمی نتائج سامنے آگئے ہیں۔ جس کے مطابق ن لیگ کی امیدوار نوشین افتخار نے 1 لاکھ 11 ہزار 220 ووٹ حاصل کیے، جبکہ تحریک انصاف کے علی اسجد ملہی 92 ہزار ووٹ حاصل کر سکے۔ یوں ن لیگ نے 19 ہزار ووٹوں کی برتری سے حکمراں جماعت تحریک انصاف کو شکست دے دی۔ضمنی انتخاب کے معرکے میں پاکستان تحریک انصاف کے علی اسجد ملہی اور پاکستان مسلم لیگ (ن) کی نوشین افتخار کے درمیان مقابلے میں عوام نے ووٹ کاسٹ کیے۔ قومی اسمبلی کے حلقہ 75 ڈسکہ کے ضمنی انتخاب میں تحریک انصاف کے امیدوار علی اسجد ملہی نے اپنا ووٹ کاسٹ ہی نہیں کیا، اسجد ملہی 2 بار اپنے آبائی حلقے میں آئے لیکن ووٹ کاسٹ نہیں کیا۔
