حکام کا کہنا تھا کہ سینٹرل فلوریڈا کی پولیس کے سامنے ہتھیار ڈالنے سے قبل بلٹ پروف جیکٹ پہنے اور خود کو متاثرہ ظاہر کرنے والے شخص نے فائرنگ کر کے خاتون اور اس کی گود موجود تین مہینے کے بچے سمیت چار افراد کو قتل کردیا۔
غیر ملکی خبر رساں ادارے’رائٹرز’ کی رپورٹ کے مطابق پولک کاؤنٹی کے پولیس افسر گریڈی جڈ نے نیوز کانفرنس میں کہا کہ فائرنگ کرنے والے شخص کی شناخت 33 سالہ برائن ریلے کے نام سے ہوئی جو امریکی بحریہ کا سابق ملازم بھی ہے، واقعے میں زخمی ہونے والی 11 سالہ بچی کی سرجری کی جارہی ہے جسے 7 گولیاں لگیں۔
انہوں نے مزید بتایا کہ برائن ریلے کا متاثرین سے کوئی تعلق نہیں تھا اور اس نے ہتھیار ڈالنے سے پہلے پولیس کے ساتھ بھی فائرنگ کا تبادلہ کیا اور اس کے بعد گولی لگنے پر علاج کے دوران ہسپتال میں ایک پولیس افسر سے اس کی پستول چھیننے کی بھی کوشش کی۔
گریڈی جڈ نے کہا کہ عراق اور افغانستان میں امریکی جنگوں کا تجربہ کار برائن ریلے ایک سیکیورٹی گارڈ کمپنی میں باڈی گارڈ کی حیثیت سے کام کرتا تھا، اس کی گرل فرینڈ نے تفتیش کاروں کو بتایا کہ وہ صدمے کے بعد کے ذہنی دباؤ کبھی کبھار ہونے والے ڈپریشن سے دوچار ہے۔
پولیس افسر کا کہنا تھا کجہ ایک ہفتہ قبل اس کی ذہنی حالت بگڑ گئی تھی اور اس نے اپنی گرل فرینڈ کو بتایا تھا کہ اس نے خدا سے بات کرنا شروع کردی ہے۔
ایک اور نیوز کانفرنس کے دوران گریڈی جڈ نے بتایا کہ ‘ایک بار اس نے ہمارے تفتیشی حکام سے کہا کہ وہ اپنی جانوں کی بھیک مانگ رہے تھے لیکن میں نے پھر بھی انہیں مار دیا‘۔
ان کے مطاق برائن ریلے نے قانون نافذ کرنے والے اداروں کے اہلکاروں سے کہا کہ وہ طاقتور نشے کا عادی ہے۔
انہوں نے بتایا کہ پہلے شوٹر بلا مقصد اس گھر پر نظر آیا جہاں ہفتے کی رات فائرنگ ہوئی تھی اور عجیب و غریب باتیں کررہا تھا لیکن جب تک پولیس پہنچی وہاں سے چلا گیا۔
گریڈی جج کا کہنا تھا کہ اگلے روز اتوار کی صبح وہ واپس آیا اور 40 سالہ شخص، 33 سالہ ماں اور اس کی گود موجود بچے کو قتل کردیا اور برابر میں موجود گھر میں ایک 62 سالہ خاتون کو بھی قتل کیا جو بچے کی ماں کی والدہ تھیں۔
ان کا مزید کہنا تھا کہ اس کے علاوہ جب اس کے شیطانی پن کو قرار نہ ملا تو اس نے فائرنگ کر کے گھر کے پالتو کتے کو بھی ماردیا۔
گریڈی جڈ نے کہا کہ خودکار بندق کے دو کارتوس چلنے کی اطلاعات کے ردِ عمل میں پہنچنے والے اہلکاروں نے ایک غیر مسلح شخص باہر دیکھا جس نے بلٹ پروف جیکٹ اور کیموفلاج پہنا ہوا تھا
