اسلام آباد ( ملک منظور احمد ) پاکستان میں چین کے سفیر نونگ رونگ نے کہا ہے کہ وزیر اعظم عمران خان کا آئندہ دورہ چین دونوں ممالک کے تعلقات کے مزید فروغ ،استحکام اور مضبوطی کا باعث بنے گا ۔چین کے سفیر کا خبریں سے گفتگو کرتے ہوئے کہنا تھا کہ پاکستان اور چین دونوں ممالک کے تعلقات آزمائے ہو ئے ہیں اور دونوں ملکوں نے ہمیشہ اچھے اور برے اوقات میں ایک دوسرے کا ساتھ دیا ہے ۔ خبریں سے خصوصی گفتگو کرتے ہوئے ا نھوں نے کہا کہ پاکستان اور چین کے درمیان تعلقات خطے کے امن اور استحکام کے لیے کلیدی حیثیت کے حامل ہیں ۔دونوں ممالک ایک دوسرے کے سٹریٹیجک پا رٹنر ہیں اور دونوں ممالک کے مضبوط تعلقات خطے میں طاقت کا توازن قائم رکھنے کے لیے بہت اہم ہیں ۔چین کے سفیر نے کہا کہ وزیر اعظم کا دورہ چین پاکستان کی ترقی اور خوشحالی کے لیے مزید راہیں کھولے گا ،سی پیک کو آگے بڑھانے کے حوالے سے بھی بات چیت ہو گی ،سی پیک دونوں ممالک کے مفاد پر مبنی ایک اہم ترین منصوبہ چین اس منصوبے کی رفتار سے مطمئن ہے اور اس منصوبے کی تکمیل سے خطے میں ترقی اور خوشحالی کی نئی راہیں کھلیں گی ۔ سرمائی او لپکس کا انعقاد چین کے لیے اہم ہے چین سرمائی او لپکس کی افتتاحی تقریب میں وزیر اعظم عمران خان کی شرکت کا خیر مقدم کرتا ہے ۔
