لاہور: (ویب ڈیسک) پاکستان سپر لیگ (پی ایس ایل) کے ساتویں ایڈیشن کے دوسرے مرحلے میں پشاور زلمی اور لاہور قلندرز کا میچ سپر اوور میں داخل ہوگیا۔
لاہور کے قذافی سٹیڈیم میں پی ایس ایل7 کا دوسرا مرحلہ جاری ہے جس میں آج کے میچ کے لئے لاہور قلندرز کی کپتانی شاہین شاہ آفریدی اور پشاور زلمی کی قیادت وہاب ریاض کررہے ہیں۔
میچ برابر ہونے کی وجہ سے سپر اوور کرایا گیا جس میں لاہور قلندرز نے پہلے کھیلتے ہوئے مقررہ 6 گیندوں پر 5 رنز بنائے، ،ہیری بروک اور فخر زمان نے بیٹنگ کی۔
6 رنز کا ہدف پشاور زلمی کی ٹیم نے صرف 2 گیندوں پر حاصل کرلیا، سینئر بیٹر شعیب ملک نے 2 گیندوں پر 2 چوکے لگا کر اپنی ٹیم کو فتح سے ہمکنار کرایا۔
پشاور زلمی کے 159 رنز ہدف کے تعاقب میں لاہور قلندرز کے کپتان شاہین آفریدی نے میچ کا پانسہ پلٹ دیا اور آخری اوور میں 3 چھکے لگا کر میچ برابر کردیا۔
قلندرز نے مقررہ 20 اوورز میں 8 وکٹ کے نقصان پر 158 رنز بنائے، کپتان شاہین شاہ آفریدی نے 4 چھکوں اور 2 چوکوں کی مدد سے 20 گیندوں پر 39 رنز کی ناٹ آؤٹ اننگز کھیل کر میچ کو سپر اوور میں پہنچایا، تاہم سپر اوور میں لاہور کی ٹیم کو شکست کا سامنا کرنا پڑا۔
قبل ازیں فخر زمان صفر، فل سالٹ 14، کامران غلام 25، محمد حفیظ 49، ہیری بروک 2، سہیل اختر 19، ڈیوڈ ویزے 1 اور حارث رؤف صفر پر آؤٹ ہوئے۔
فاتح ٹیم کی جانب سے ارشد اقبال اور وہاب ریاض نے 2،2 ، شعیب ملک، خالد عثمان، محمد عمر اور عماد بٹ نے 1،1 کھلاڑی کو پویلین کی راہ دکھائی۔
پشاور زلمی نے لاہور قلندرز کیخلاف 158 رنز بنائے۔ شعیب ملک 32 رنز کے ساتھ نمایاں رہے، دیگر کھلاڑیوں میں محمد حارث 6، حضرت اللہ زازائی 20، کامران اکمل18، حیدر علی25، حسین طلعت 17، خالد عثمان 19 رنز بنا سکے۔ فواد احمد نے دو وکٹیں حاصل کیں۔
پی ایس ایل7: شاہین کی محنت رائیگاں، پشاور کی سپر اوور میں لاہور کو شکست
