لاہور : (ویب ڈیسک) وزیراعلیٰ پنجاب چودھری پرویز الٰہی کا کہنا ہے کہ تاریخ عالم پاک فوج کی بہادری کی لازوال داستانیں رقم کرنے کی کوئی دوسری مثال پیش کرنے سے قاصر ہے۔
یوم دفاع و شہداء کے خصوصی پیغام میں پرویز الٰہی نے کہا کہ آج کے دن پاک فوج کے عظیم شہداء کو خراج عقیدت پیش کرتے ہیں۔ 1965 کی جنگ پاکستان کی دفاعی تاریخ کا ایک شاندار باب ہے، وطن کے دفاع کے جذبے سے سرشار مسلح افواج کے افسروں اور جوانوں نے دشمن کے مذموم عزائم کو خاک میں ملایا۔
مکار دشمن کو دندان شکن جواب دینے والے شہداء آج بھی قوم کے دلوں میں زندہ ہیں، فوج نے ہر محاذ پر بہادری کی شاندار مثالیں قائم کیں جنہیں ہمیشہ یاد رکھا جائے گا، پاک فوج نے دشمن کو منہ توڑ جواب دیا، 1965 کی جنگ میں دشمن کو دندان شکن جواب دینے والے غازیوں کو بھی سلیوٹ کرتے ہیں۔
انہوں نے مزید کہا کہ ملکی سلامتی کیلئے پوری قوم اور پاکستان کی بہادر مسلح افواج یکجان ہیں، پاکستان کے پاس دنیا کی بہترین فوج ہے جو ہر جارحیت سے نمٹنے کی بھرپور صلاحیت رکھتی ہے۔
1965 کی جنگ پاکستان کی دفاعی تاریخ کا شاندار باب ہے: پرویز الہٰی
