سعودی عرب، نیوم بحران کا شکار’ منصوبہ محدود کرنے کیلئے 16ارب ڈالرز خرچ ہونگے

ریاض(آئی این پی)سعودی حکومت نے اپنے فلیگ شپ منصوبے نیوم میں شامل چند متنازع اور
مہنگے منصوبوں کے بعض حصوں کو ختم کرنے کے لئے آئندہ 5سال میں 60ارب ریال، یعنی 16 ارب ڈالرز خرچ کرنے کا فیصلہ کیا ہے۔عالمی میڈیا رپورٹس کے مطابق بعض منسوخ کیے گئے منصوبوں کے ٹھیکیداروں کے ساتھ معاہدے ختم کرنے کیلئے جرمانے اور دیگر ادائیگیاں کی جائیں گی جس کے باعث منصوبے ختم کرنے پر ہی اربوں ڈالرز خرچ ہوں گے۔نیوم میں پہاڑوں پر برفانی تفریحی مقام، بحیرہ احمر کے ساحلی تفریحی مراکز اور صنعتی زون سمیت متعدد بڑے منصوبے شامل ہیں جن کا مقصد سعودی معیشت کو تیل پر انحصار سے نکال کر سیاحت اور دیگر شعبوں کی جانب لے جانا ہے۔منصوبے کا مرکزی حصہ 170 کلو میٹر طویل اور 2 کلو میٹر چوڑا شہر دی لائن تھا جسے صحرا میں سیدھی لکیر کی شکل میں تعمیر کرنے کا منصوبہ بنایا گیا تھا، منصوبے میں ایک سرے سے دوسرے سرے تک ریل کے ذریعے سفر کی سہولت بھی شامل تھی۔دی لائن کی ابتدائی لاگت تقریبا 500 ارب ڈالرز بتائی گئی تھی تاہم منصوبے کو ابتدا ہی سے شہری منصوبہ بندی کے ماہرین نے غیر حقیقی اور ناقابلِ برداشت قرار دیا تھا۔رپورٹس کے مطابق سعودی عرب اب تک نیوم پر 50ارب ڈالرز سے زیادہ خرچ کر چکا ہے جبکہ بعض دیگر رپورٹس میں اب تک ہونے والے اخراجات 64ارب ڈالرز تک بتائے گئے ہیں۔رواں سال جنوری میں فنانشل ٹائمز نے رپورٹ کیا تھا کہ بڑھتی ہوئی لاگت اور تاخیر کے باعث نیوم منصوبے کو نمایاں طور پر محدود کیا جا رہا ہے اور حکام اصل منصوبے کے مقابلے میں بہت چھوٹے منصوبے پر غور کر رہے ہیں۔