نیویارک: (ویب ڈیسک) پاکستان کے وزیر خارجہ بلاول بھٹو زرداری نے امریکہ میں اقوام متحدہ کے سیکریٹری جنرل سے ملاقات کی ہے۔ یہ ملاقات اقوام متحدہ ہیڈ کوارٹرز نیو یارک میں ہوئی۔ اس موقع پر بلاول بھٹو کے ہمراہ اقوام متحدہ میں پاکستان کے مستقل مندوب منیراکرم، امریکہ میں پاکستان کے سفیر مسعود خان، نائب مستقل مندوب عامر خان بھی موجود تھے۔ وزیر خارجہ بلاول بھٹو کی اقوا م متحدہ کے سیکریٹری جنرل انتونیو گوٹیرس سے ملاقات میں دو طرفہ امور پر تبادلہ خیال کیا گیا۔

اسلام آباد (ویب ڈیسک) مارگلہ پر آگ لگانے والی ٹک ٹاکر کی گرفتاری کے لئے کاروائی شروع ٹک ٹاکر ڈولی کو گرفتار کرنے اسلام آباد پولیس کی ٹیم لاہور روانہ ہو گئی۔اسلام آباد پولیس نے بتایا کہ خاتون ٹک ٹاکر کے 3 ساتھیوں کو اسلام آباد سے حراست میں لے لیا گیا جس میں ایڈیٹر اور کیمرہ مین شامل ہیں۔ڈولی نامی ٹک ٹاکر کے خلاف تھانہ کوہسار میں سی ڈی اے کی مدعیت میں مقدمہ درج کیا گیا۔مقدمہ تھانہ کوہسار میں اسسٹنٹ ڈائریکٹر شعبہ ماحولیات سی ڈی اے کی مدعیت میں درج کیا گیا ۔ مقدمے کے متن میں کہا گیا ہے کہ سوشل میڈیا پر ڈولی نامی ٹک ٹاکر کی ویڈیو گردش کررہی ہے ، جس میں خاتون جنگل میں آگ لگا کر ویڈیو شوٹ کروارہی ہے ، مبینہ طور پر مارگلہ ہلز نیشنل پارک کا علاقہ ہے جہاں آتشزدگی کے متعدد واقعات ہوئے اور آگ سے چرند پرند پودوں اور درختوں وسیع پیمانے پر نقصان پہنچا ۔گزشتہ روز انکشاف ہوا تھا کہ مارگلہ کے جنگلات میں آگ لگانے میں ٹک ٹاکرز کا ہاتھ ہے ، اس حوالے سے 2 نوجوانوں کیلئے ویڈیو سامنے آئی جس میں ٹک ٹاکرز کو لائیٹر سے آگ لگاتے دیکھا جا سکتا ہے جب کہ ایک اور ویڈیو میں معروف خاتون ٹک ٹاکر بھی مارگلہ پہاڑیوں پر آگ کے دوران ٹک ٹاک بناتی نظر آ رہی ہیں۔ سوشل میڈیا پر ویڈیوز سامنے آنے کے بعد صارفین کی جانب سے سخت ردِعمل کا مظاہرہ کیا گیا اور متعلقہ حکام سے مذکورہ ٹک ٹاکرز کے خلاف کارروائی کرنے کی درخواست کی گئی ، صارفین نے ٹک ٹاکرز کو سزا دینے کا بھی مطالبہ کیا تاکہ آئندہ اس طرح کے واقعات دوبارہ نہ ہوں۔

اسلام آباد: (ویب ڈیسک) چیف جسٹس آف پاکستان جسٹس عمر عطا بندیال نے تفتیشی اداروں میں حکومتی مداخلت کا نوٹس لے لیا۔
چیف جسٹس آف پاکستان جسٹس عمر عطاء بندیال کی طرف سے لیے گئے از خود نوٹس کی سماعت جمعرات ہو گی، چیف جسٹس کی سربراہی میں 5 رکنی لارجزبینچ سماعت کرے گا۔
سپریم کورٹ نے کہا ہے کہ افسروں کے تبادلوں، تحقیقات میں مداخلت سے نظام انصاف میں خلل پڑ سکتا ہے، حکومتی مداخلت سے شواہد ضائع ہونے اور پراسیکیوشن پر اثرانداز ہونے کا خدشہ ہے۔ احتساب قوانین میں تبدیلی نظام انصاف کو نیچا دکھانے کے مترادف ہے۔

راولپنڈی: (ویب ڈیسک) آرمی چیف جنرل قمر جاوید باجوہ نے بہترین خدمات سرانجام دینے والے پاک فوج کے افسروں اور جوانوں کو فوجی اعزازات سے نواز دیا۔
پاک فوج کے شعبہ تعلقات عامہ (آئی ایس پی آر) کے مطابق پاک فوج کے افسران کو اعزازات دینے کی تقریب جنرل ہیڈ کوارٹرز (جی ایچ کیو) میں ہوئی جہاں آرمی چیف جنرل قمر جاوید باجوہ نے اعزازات تقسیم کیے۔
آئی ایس پی آر کے مطابق اس موقع پر 48 افسران کو ستارہ امتیار (ملٹری)، سات افسروں ، تین جونیئر کمیشنڈ افسران (جے او سی) اور 30 سپاہیوں کو تمغہ بسالت سے نوازا گیا۔ شہدا کے میڈلز ان کے اہل خانہ نے وصول کیے۔ تقریب میں بڑی تعداد میں پاک فوج کے سینئر افسران اور شہدا کے اہل خانہ بھی موجود تھے۔
جی ایچ کیو میں شہداء اور غازیوں کی تقریب سے آرمی چیف جنرل قمر جاوید باجوہ نے خطاب کرتے ہوئے انہوں نے کہا کہ آج ہم پھر مادر وطن پر قربان ہونے والے بہادر جوانوں کو خراج تحسین پیش کرتے ہیں۔
انہوں نے کہا کہ ہم محفوظ پاکستان میں رات کو آرام سے سوتے ہیں۔ یہ جوانوں کے خون کی قربانی کی وجہ سے ممکن ہوا۔
ان کا کہنا تھا کہ ہمیشہ کہتا ہوں اصل ہیرو ہمارے شہید ہیں۔ جو قومیں اپنے شہیدوں یا ہیروز کو بھول جاتی ہیں وہ قومیں مٹ جایا کرتی ہیں۔
آرمی چیف نے کہا کہ میں یہ مانتا ہوں کہ کوئی بھی دیکھ بھال اور مراعات شہادت کا نعم البدل نہیں ہو سکتی۔
ان کا کہنا تھا کہ ایک والداور والدہ کیلئے، جب تک وہ اس دُنیا میں زندہ ہیں اُن کا بچہ اُن کی نظر کے سامنے ضرور روز آئے گا، روز اُن کو یاد آئے گا۔ ایک بیوہ جس کا خاوند اُس کے ہاتھ سے چلا گیا اور وہ بچے جن کے سر سے باپ کی شفقت اُٹھ گئی ہے، اُن کو بھی اُس کی کمی ضرور محسوس ہو گی اور اس کا کوئی بھی نعم البدل نہیں ہو سکتا۔
انہوں نے کہا کہ فوج ہی ہے جو صُبح سے لیکر شام تک پاکستان کے ہر چپہ، کیا سیلاب ہو، کیا طوفان ہو، کیازلزلہ ہو یا کووڈہو۔ہر جگہ فوج آپ کو ملے گی۔ کوئی حادثہ ہو فوج بتائے بغیر وہاں پر پہنچ جاتی ہے۔ یہ فوج ہی ہے جو صبح سے لیکر شام تک پاکستان کے ہر چپہ ہر جگہ آپ کو ملے گی۔

نیو یارک: (ویب ڈیسک) وزیر خارجہ بلاول بھٹو نے امریکی وزیر خارجہ انٹونی بلنکن سے اقوام متحدہ کے ہیڈ کوارٹرز کی عمارت میں ملاقات کی ہے۔
امریکی وزیر خارجہ کا کہنا تھاکہ پاکستانی وزیر خارجہ کے ساتھ پاکستان اورامریکا کی درمیان مضبوط تجارت اوراقتصادی تعاون پربات ہوگی۔ علاقائی سکیورٹی پرگفتگوبھی ملاقات میں شامل ہے، پاکستان جی 77 کی سربراہی کررہا ہے، اس سے بھی بہترتعلقات کے خواہشمند ہیں۔
انہوں نے مزید کہا کہ پاکستانی حکومت اوربلاول کےساتھ مل کرکام کرنے پرخوشی ہے، بلاول سے فوڈ سکیورٹی کے مسئلے پر بات ہوگی، یہ اہم چیلنج ہےجسے پوری دنیاکو سامنا ہے۔
روس اور یوکرین جنگ کے حوالے سے ان کا کہنا تھاکہ یوکرین پر روسی حملے کے بعد فوڈ سکیورٹی کا مسئلہ شدید ہوچکا ہے، اس سےمزید 4 کروڑ لوگ فوڈ سکیورٹی کے مسائل کا شکار ہوئے، فوڈ سکیورٹی کے مسئلے سے نمٹنے کیلئے ہم اکھٹے ہو رہے ہیں، اس مسئلےسے نمٹنے کیلئے ٹھوس اقدامات کی کوششوں میں پاکستان کی شمولیت پر شکر گزار ہیں۔
امریکی وزیر خارجہ کا کہنا تھاکہ دوطرفہ معاشی اورتجارتی تعلقات کو مزید مضبوط کرنے اور علاقائی سکیورٹی پرتوجہ مرکوز ہے۔

اسلام آباد: (ویب ڈیسک) بلوچستان حکومت کی ترجمان فرح عظیم شاہ نے کہا ہے کہ بلوچستان میں بیرونی ہاتھ ہماری بلوچ خواتین کو استعمال کر رہے ہیں، خواتین خودکش حملہ آوروں کو تیار کیا جا رہا ہے۔
اسلام آباد میں پریس کانفرنس کرتے ہوئے ترجمان بلوچستان کا کہنا تھا کہ کاؤنٹر ٹیرر ازم ڈیپارٹمنٹ (سی ٹی ڈی) نے تربت میں کارروائی کے دوران مکان سے خاتون کو ساتھی سمیت گرفتار کیا، خاتون نور جہاں اور اس کے ساتھی کا تعلق کالعدم بی ایل اے کی ذیلی تنظیم مجید بریگیڈ سے ہے۔ آپریشن کے دوران خاتون اہل کار بھی شامل تھیں، مکان سے خودکش جیکٹ، کلاشنکوف، 9 کلو باروی مواد اور 6 ہینڈگرنیڈ ملے، مقدمہ درج کر کے خاتون سے تفتیش کی جارہی ہے، عدالت نے خاتون اور اس کے ساتھ کا 7 روزہ ریمانڈ دیا ہے۔
اپنی بات کو جاری رکھتے ہوئے فرح عظیم شاہ نےکہا کہ گرفتاری ہونے والی خاتون نورجہاں نے تفتیش میں انکشاف کیا کہ بلوچستان میں خواتین خودکش حملہ آوروں کو تیار کیا جا رہا ہے، مجید بریگیڈ خواتین کو خودکش حملے کے لیے تیار کر رہی ہے، مارے گئے دہشت گرد اسلم عرف اچھو کی بیوی یاسمین ان کی سربراہی کر رہی ہے۔
ترجمان نے بتایا کہ نورجہاں نے اعتراف کیا ہےکہ اسے دبئی سے ایک شخص ندیم کے ذریعے مالی معاونت حاصل تھی، دبئی سے پیسے دہشت گردوں کو ٹرانسفر ہونے کے معاملے پر دبئی کی حکومت سے سرکاری رابطے کیے جارہے ہیں۔

گوجرانوالا: (ویب ڈیسک) پاکستان تحریک انصاف (پی ٹی آئی) کے چیئر مین اورسابق وزیراعظم عمران خان نے کہا ہے کہ سابق صدر آصف علی زرداری ن لیگ پر بھاری ہے۔ شہباز شریف غلط فہمی میں نہ رہنا ہم نے تمہیں نہیں چھوڑنا، وہ وقت زیادہ دورنہیں تم جیسے ہی اقتدارسے باہر ہو گے تمہیں جیل میں ڈالیں گے۔عوام کا جذبہ جنون دیکھ کراب کوئی شک نہیں اسی ماہ اسلام آباد میں اپنی حقیقی آزادی کی جنگ جیت کرایک نیا پاکستان بنائیں گے۔
گوجرانوالا میں پاکستان تحریک انصاف (پی ٹی آئی) کے پاور شو سے خطاب کرتے ہوئے سابق وزیراعظم نے کہا کہ 21 سال کرکٹ کھیلی لیکن سٹیڈیم میں اتنے زیادہ لوگ نہیں دیکھے، شانداراستقبال، جذبے، جنون پر دل سے عوام کا شکریہ ادا کرتا ہوں، ماشااللہ میرا گوجرانوالہ اسلام آباد مارچ کے لیے تیارہے، یہ سیاست نہیں انقلاب آرہا ہے۔ سارے پاکستان کے بڑے، بڑے ڈاکو، مافیا ایک طرف کھڑے ہوگئے، اللہ کا شکرادا کرتا ہوں میری قوم دوسری طرف کھڑی ہوگئی۔
انہوں نے کہا کہ جب قوم ،ایک قوم بن کر کھڑی ہوجائے اس کوانقلاب کہتے ہیں، کرپٹ مافیا لوگوں کا خون چوستے ہیں، مافیا کو بُری طرح شکست دیں گے۔ گوجرانوالا والو ! کیا اسلام آباد کے لیے تیار ہو، میں اسلام آباد پاکستان کی حقیقی آزادی کی جنگ لڑنے کے لیے سب کو بلا رہا ہوں، پاکستان کے بڑے ڈاکوؤں کو اکٹھا کر کے پاکستان کی منتخب حکومت کوسازش کے تحت گرایا گیا، بتائیں یہ سازش تھی یا مداخلت ؟
اپنی بات کو جاری رکھتے ہوئے پی ٹی آئی چیئر مین کا کہنا تھا کہ نوجوانوں کے شعور کو سلام پیش کرتا ہوں، پہلے سازش پھراس کے بعد مداخلت ہوتی ہے۔ یہ سمجھ رہے تھے جب بھی وزیراعظم کو نکالا جاتا ہے تو مٹھائیاں بانٹی جاتی ہیں، میری قوم مٹھائیاں بانٹنے کے بجائے سڑکوں پر نکل آئی، دو وجہ سے اسلام آباد بلا رہا ہوں، ایک امریکی سازش کو ناکام بنانا ہے، دوسرا ملک کے بڑے ڈاکو، قاتل، منشیات فروشوں سازش کرنے والوں کیخلاف نکلنا ہے۔
عمران خان کا کہنا تھا کہ ہماری قوم زندہ اورآزاد ہے اس لیے سڑکوں پر ہے، جب ہماری حکومت ہٹائی گئی اس وقت ملکی دولت میں تیزی سے اضافہ ہو رہا تھا، ہماری حکومت میں تاریخی ایکسپورٹ ہو رہی تھی، پچھلے نو ماہ میں 26 فیصد پاکستان کی ایکسپورٹ بڑھی، ایوب خان کے دورکے بعد پاکستان کی انڈسٹری اٹھنا شروع ہوئی۔ بیرون ملک پاکستانیوں نے ریکارڈ 31 ارب ڈالر بھیجے، ہم نے پاکستان کی تاریخ کا سب سے زیادہ ٹیکس اکٹھا کیا، زیادہ ٹیکس اکٹھا ہونے پر حکومت نے پٹرول، ڈیزل کی قیمتوں کو کم کیا تھا، دنیا میں تیل کی قیمتیں بڑھ رہی تھیں، ہم نے عوام پر کم بوجھ ڈالا، ہماری حکومت نے کسانوں کوپیداوارکا پورا معاوضہ دیا، ہمارے دوسالوں میں کسانوں کا سب سے زیادہ خوشحالی میں گزرا۔
انہوں نے کہا کہ کورونا کی وجہ سے پوری دنیا میں غربت اور تباہی پھیلی، کورونا کے دوران ہم نے معیشت اور لوگوں کوغربت سے بچایا، برصغیرمیں سب سے زیادہ روزگار پاکستان میں ملا، جب ہمارا ملک صیح راستے پر جا رہا تھا تو ڈاکوؤں نے امریکا کیساتھ ملکر ہماری حکومت گرائی، شہبازشریف نے بڑی محنت سے امریکیوں کے جوتے پالش کیے، امریکی سفارتکار خاتون کا مریم نوازنے ایسا استقبال کیا لگ رہا تھا وہ اسے کہے اس پرجوتے رکھ کر چلو۔
پی ٹی آئی چیئر مین کا کہنا تھا کہ آصف زرداری آج کل بڑا خوش ہیں، آصف زرداری ساری گالیاں ن لیگ کو پڑنے پر بڑا خوش ہے، آصف زرداری پیسے بنارہا ہے اور گالیاں ن لیگ کوپڑ رہی ہیں، واقعی زرداری تم (ن) لیگ پر بھاری اور ان سے اچھا بدلہ لے رہے ہو، چیری بلاسم امریکی سفارتکاروں کے جوتے پالش کرتا ہے، چیری بلاسم فوجی بوٹ ایسے پالش کرتا ہے کہ اسے اپنی شکل نظر آتی ہیں، شہبازشریف وزیراعظم تو بن گیا ہے اب سے سمجھ نہیں آ رہی، شہبازشریف کو اچکن سلوانے کا بڑا شوق تھا اب عوام کوجواب دو۔
سابق وزیراعظم کا کہنا تھا کہ بزدل نوازشریف دوسری دفعہ ملک چھوڑ کر بھاگا ہے، دونوں بھائی اب پھنس گئے، آگے سمندر اور پیچھے عمران خان کھڑا ہےخ آگے جاتے ہیں تو سمندر تو پیچھے عمران خان عوام کو لیکر کھڑا ہے، مسلم لیگ والو سن لو آپ لوگوں کو 30 سال ہر بار بچایا گیا، 30 سال سے دونوں بھائی ظلم کر رہے تھے، کان کھول کرسن لو ڈاکوؤ تمہارا وقت آگیا عوام کا سمندرتمہیں بہالے جائے گا۔ شہباز شریف سے لوگ پوچھتے ہیں اے کی کیتاخ اے پھنسوا دیا سانوں، شہباز شریف کو اس لیے جلدی تھی ایف آئی اے کیس میں سزا ہونے والی تھی، شہباز غلط فہمی میں نہ رہنا ہم نے تمہیں نہیں چھوڑنا، ڈاکٹررضوان تمہاری وجہ سے مرا، شہباز شریف وقت زیادہ دورنہیں تم جیسے ہی اقتدارسے باہرتمہیں جیل میں ڈالیں گے، تمہارے کیس کو وہی سے شروع کریں گے۔ 30سال بعد اسمبلی ڈیزل کے بغیرچل رہی تھی، اب یہ پھرڈیزل کولے آئے ہیں، سپریم کورٹ کولوٹوں کوفارغ کرنے پرخراج تحسین پیش کرتا ہوں۔
انہوں نے کہاکہ شکرہے اللہ کا گوجرانوالا سے کوئی لوٹا نہیں ہوا، جنوبی پنجاب سے بڑے لوٹے ہوئے، پرسوں ملتان لوٹوں کا بندوبست کرنے جا رہا ہوں، جنہوں نے حلقوں سے غداری کی شکریہ سپریم کورٹ ان کو فارغ اور ذلیل بھی کیا۔ جب سب نے مل کر میری حکومت گرائی تو صحافی نے پوچھا کون، کون شامل تھے تو میں نے کہا تھا کوئی نہیں رہ گیا سب ایک طرف چلے گئے، سب مافیا نے ملکر مجھے گرایا، گھر پہنچا تو سوچ رہا تھا لوگ مٹھائیاں بانٹیں گے، سوشل میڈیا پر جو کچھ دیکھا ہاتھ اٹھا کر اللہ کا شکر ادا کیا تو نے میری قوم کو جگا دیا، وزارت عظمیٰ تو کچھ نہیں، اسے جوتے کی نوک پر رکھتا ہوں، اللہ نے میری قوم کو جگا دیا، ایک قوم بننے پر ہم سب کو اللہ کا شکر ادا کرنا چاہیے، جب ہم ایک قوم بن جائیں گے تو ہمارے لیے قرضے واپس کرنا کوئی مشکل نہیں ہوگا،2010سیلاب کے دوران قوم نے ملکرمشکلات کا سامنا کیا، انشااللہ ہم ایک قوم بن کر پاکستان کو اپنے پاؤں پر کھڑا کریں گے، 26سال پہلے وعدہ کیا تھا کبھی جھکا اورنا کبھی عوام کوجھکنے دوں گا۔
عمران خان نے مزید کہا کہ گوجرانوالا کی بہنوں، بچوں، فیملیزنے اسلام آباد آنا ہے، حقیقی آزادی کے لیے سب نے باہر نکلنا ہے، اللہ کے سوا کوئی خدا نہیں، ہم امریکا کے سامنے نہیں جھکیں گے، ہم پیارے نبی ﷺ کے امتی ہیں، یہاں کا جذبہ جنون دیکھ کراب کوئی شک نہیں انشااللہ اسی ماہ اسلام آباد میں اپنی حقیقی آزادی کی جنگ جیت کرایک نیا پاکستان بنائیں گے،عمران خان حقیقی آزادی مارچ کی پرفارمنس دیکھ کر گوجرانوالا کے ممبران کو ٹکٹ دوں گا، اسلام آباد جانے کے لیے ڈرو گے تو نہیں، پولیس کی فکر نہ کرنا اب حمزہ شہباز کو اچکن اتارنا پڑے گی، اب تو پولیس اورسرکاری افسران کی فیملیزبھی ہمارے ساتھ اسلام آباد جائیں گی، ابھی سے اسلام آباد کی تیاری کر لو، مجھے اتنا پتا ہےمیری فوج کی فملیزبھی انشااللہ اسلام آباد جائیں گی۔

لاہور: (ویب ڈیسک) پاکستان تحریک انصاف (پی ٹی آئی) کے رہنما اور سابق وفاقی وزیر اطلاعات فواد چودھری نے کہا ہے کہ پورے ملک میں الیکشن ہونے چاہئیں، مرکز میں صدر مملکت کسی بھی وقت شہباز شریف کو اعتماد کے ووٹ کا کہہ سکتے ہیں، کل پیٹیشن دائر کر رہے ہیں، حمزہ شہباز وزیراعلیٰ پنجاب نہیں رہے۔
لاہور میں میڈیا سے گفتگو کرتے ہوئے فواد چودھری کا کہنا تھا کہ میری نظرمیں اس وقت شہباز شریف کے پاس 172ووٹ نہیں، اس وقت سیاسی بحران ہیں، اگر سیاسی بحران ٹھیک ہوگا تو معاشی بحران ٹھیک ہوگا، سیاسی بحران حل کرنے کی واحد صورت آزادانہ الیکشن ہے۔
انہوں نے مزید کہا کہ شہباز شریف، حمزہ شہباز نے جو چورن بیچا تھا جس نے کھایا بدہضمی ہوگئی ہے، انہوں نے معیشت کا بھٹہ بٹھا دیا ہے، حکومتی وزرا کی آنکھوں میں آنسو ہے وہ کہہ رہے ہیں کدھر بٹھا دیا ہے، حکومت کے آخری دن چل رہے ہیں ان کو زیادہ ضد نہیں کرنی چاہیے، عمر چیمہ صبح اسلام آباد ہائی کورٹ میں درخواست دائر کریں گے، امید ہے عمر چیمہ گورنر ہاؤس واپس آئیں گے۔
ان کا کہنا تھا کہ ہم خود ہی عدالت سے رجوع کر رہے ہیں، پورے ملک میں کوئی حکومت نہیں ہے، چیف جسٹس لاہور ہائیکورٹ سے درخواست ہوگی جلد فیصلہ کریں تاکہ بحران کا خاتمہ ہو، چیف سیکرٹری، آئی جی پنجاب میرٹ سے ہٹ کر فیصلوں کو ریورس کریں، اگر غیر قانونی تعنیاتیوں کو جاری رکھا گیا تو ہم کارروائی کریں گے۔
سابق وفاقی وزیر نے کہا کہ مجھے نہیں پتا اسٹیبلشمنٹ اس وقت دباؤ ڈال رہی ہے، میڈیا، اسٹیبلشمنٹ سمیت سب چاہتے ہیں بحران حل ہو، سپریم کورٹ کے کبھی فیصلے صحیح اور کبھی غلط ہوتے ہیں، جو فیصلے غلط ان پر تنقید ہوگی، بھٹو کے کیس کو ہم صحیح فیصلہ تو نہیں کہہ سکتے، الیکٹرول ریفارمز پر بات ہوسکتی ہے لیکن الیکشن کی تاریخ کا پہلے اعلان ہونا چاہیے، ستمبر میں الیکشن ہو سکتے ہیں۔