این ڈی ایم اے نے زلزلے سے نقصانات کی رپورٹ جاری کردی

اسلام آباد: (ویب ڈیسک) نیشنل ڈیزاسٹر مینجمنٹ اتھارٹی (این ڈی ایم اے) نے ملک کے بیشتر علاقوں میں گزشتہ روز آنے والے زلزلے سے ہونے والے نقصانات پر مبنی رپورٹ جاری کردی۔
رپورٹ کے مطابق گزشتہ روز پاکستان میں 6.8 شدت کا زلزلہ آیا، زلزلے کا مرکز افغانستان کا ہندوکش پہاڑی سلسلہ تھا، زلزلے کے باعث 11 افراد جاں بحق ہوئے، جاں بحق تمام افراد کا تعلق خیبرپختونخوا سے ہے جن میں 2 بچے، 3 خواتین اور 6 مرد شامل ہیں۔
خیبرپختونخوا کے مختلف مقامات پر 77 افراد زخمی بھی ہوئے جبکہ پنجاب کے مختلف مقامات پر زخمی ہونے والوں کی تعداد 2 ہے۔
زلزلے میں مجموعی طور پر 172 گھروں کو نقصان ہوا، خیبرپختونخوا میں 169، آزاد کشمیر میں 2 گھروں کو نقصان، خیبرپختونخوا میں 22 گھر مکمل طور پر تباہ ہوگئے ہیں، خیبرپختونخوا میں 4 سکولوں اور 4 عمارتوں کو معمولی نقصان ہوا، گلگت بلتستان میں ایک مسجد شہید ہوئی، غذر میں ساندی یاسین پل کو بھی جزوی نقصان پہنچا۔
زلزلے میں مجموعی طور پر19 مویشی ہلاک ہوئے جن میں خیبرپختونخوا میں 17، آزادکشمیر میں 2 مویشی ہلاک ہوئے، گلگت بلتستان میں مویشیوں کا باڑہ بھی گر گیا، آزاد کشمیر میں مویشیوں کے ایک باڑے کو جزوی نقصان۔