تحریک انصاف نے حکومت کو بیٹھ کر الیکشن پر بات کرنے کی دعوت دے دی

اسلام آباد:(ویب ڈیسک) سینیٹ میں اپوزیشن لیڈر اور پاکستان تحریک انصاف کے رہنما ڈاکٹر شہزاد وسیم نے حکومت کو مخاطب کرتے ہوئے کہا کہ آئینی اور قانونی فریم ورک میں بیٹھ کر الیکشن کے راستے کی بات کریں، آگے بڑھنے کی بات کریں۔
پارلیمنٹ کے مشترکہ اجلاس سے خطاب کرتے ہوئے ڈاکٹر شہزاد وسیم نے کہا کہ زمان پارک میں عمران خان کا گھر فتح کرنے کیلئے چڑھ دوڑے، لوگوں پر بہت بے دردی سے شیلنگ اور تشدد کیا گیا، کارکنوں کو گھروں سے اٹھا کر لے گئے، آٹے کے حصول کیلئے لوگوں کی جانیں جا رہی ہیں، پٹرول پر سبسڈی کی بات کرتے ہیں تو آئی ایم ایف کی طرف سے جھاڑ پڑتی ہے۔
اپوزیشن لیڈر نے مزید کہا کہ پارلیمنٹ مکمل صدر کے آفس کے ساتھ ہوتی ہے، صدر آئین کی طرف توجہ دلائیں تو آپ ناراض ہو جاتے ہیں، سیاسی پارٹیاں عوام میں جاتی ہیں، ان کا عوام سے تعلق ختم نہیں ہوتا، عمران خان اپنی بات نہیں لوگوں کی بات کر رہا ہے، تحریک انصاف کسی بھی قسم کا انتشار نہیں چاہتی، ہم پرامن الیکشن کی بات کرتے ہیں۔
ڈاکٹر شہزاد وسیم نے کہا کہ یہاں فساد اور انتشار کر کے الیکشن سے بھاگنے کے بہانے بنائے جاتے ہیں، آئین پاکستان نے فیڈریشن کے تمام یونٹ کو اکٹھا رکھا ہوا ہے، قومی لیڈر ہوتے ہیں ان کا قوم کو اکھٹا رکھنے میں ایک اہم کردار ہوتا ہے، جب کوئی لیڈر پاپولر ہوتا ہے اس کی جان کو خطرہ ہو جاتا ہے، ہمیں تاریخ سے سیکھنا ہے۔