وزیراعظم سے مسلم لیگ (ن) کی خواتین پارلیمنٹیرینز کے وفد کی ملاقات

اسلام آباد:(ویب ڈیسک) وزیراعظم شہباز شریف سے پاکستان مسلم لیگ (ن) کی خواتین پارلیمنٹیرینز کے 18 رکنی وفد نے ملاقات کی جس میں وزیراعظم نے ان کے پارلیمنٹ میں فعال کردار کو سراہا۔
وزیراعظم نے کہا کہ خواتین پاکستان کی آبادی کا 51 فیصد ہیں، قانون سازی میں خواتین کی شمولیت انتہائی اہمیت کی حامل ہے، حکومت ہر شعبے میں خواتین کی شمولیت کیلئے ترجیحی بنیادوں پر کام کر رہی ہے۔
انہوں نے کہا کہ آئین پاکستان تمام اداروں کے درمیان توازن کا ضامن ہے، پارلیمنٹ کو انتظامی امور میں بہتری کیلئے قانون سازی کا اختیار حاصل ہے، پنجاب میں اپنی دور حکومت میں خواتین کو با اختیار بنانے کیلئے بہت سے اقدامات کیے، ان میں خواتین کے حقوق کے حوالے سے قانون سازی بھی شامل تھی۔