مجھے اور شہروز کو ساتھ دیکھ کر میری بیٹی بہت پرجوش ہوتی ہے: سائرہ یوسف

لاہور: (ویب ڈیسک) پاکستان شوبز انڈسٹری کی معروف اداکارہ سائرہ یوسف نے کہا ہے کہ مجھے اور شہروز کو ساتھ دیکھ کر میری بیٹی بہت پرجوش ہوتی ہے۔
پاکستان شوبز انڈسٹری کے معروف اداکار شہروز سبزواری اور ان کی سابقہ اہلیہ اداکارہ سائرہ یوسف اپنی نئی فلم "بے بی لیشیس” کی تشہیر میں مصروف ہیں۔
عیسیٰ خان کی ہدایتکاری میں بننے والی اس فلم کی پروڈکشن اور عکسبندی کا آغاز کورونا وباء کے آنے سے قبل ہو گیا تھا تاہم کچھ وجوہات کے باعث فلم کی ریلیز تاخیر کا شکار رہی ، فلم اب عید الاضحیٰ پر ریلیز کی جائے گی۔
اس حوالے سے فلم میں مرکزی کردار ادا کرنے والی اداکارہ سائرہ یوسف کا کہنا تھا کہ سال 2017 سے پہلے بے بی لیشیس کو ٹیلی فلم کے طور پر پیش کیا جانا تھا تاہم پھر یہ فیصلہ کیا گیا کہ اسے ایک فیچر فلم بنایا جائے تو اس کے سکرپٹ پر کام کیا گیا۔
ان کا کہنا تھا کہ فلم کی عکس بندی مختلف حصوں میں ہوئی لیکن اہم وجہ یہ تھی کہ کوویڈ آگیا تھا اور تھوڑا بہت کام رہتا بھی تھا، ان حالات میں کام بہت مشکل سے ہورہا تھا آپ کچھ بھی نہیں کرسکتے تھے۔
واضح رہے کہ اداکارہ سائرہ یوسف اور شہروز سبزواری پہلی مرتبہ اس فلم میں بڑے پردے پر ایک ساتھ نظر آئینگے، دونوں کے درمیان 2020 میں علیحدگی ہوگئی تھی جبکہ دونوں کی ایک بیٹی نورے بھی ہے۔
تاہم فلم میں شہروز کے ساتھ کام کرنے کے حوالے سے سائرہ یوسف کا کہنا تھا کہ بہت اچھا تجربہ تھا، نہ صرف شہروز بلکہ دیگر اداکاروں کے ساتھ بھی کام کرکے بہت مزہ آیا۔
اداکارہ نے بتایا کہ جب فلم کا ٹریلر ریلیز ہوا تو میری بیٹی نورے بہت پرجوش تھی وہ ہمارے ہی فلم کے سیٹ پر موجود ہوتی تھی اب وہ بڑی ہورہی ہے تو اسے ان چیزوں کا زیادہ اندازہ ہے کہ میں اپنے دوستوں کے ساتھ فلم دیکھنے جاؤں گی۔
فلم میں شہروز اور سائرہ کے علاوہ عامر قریشی، مانی، آدی، سمیت دیگر شامل ہیں، یہ فلم عید الاضحی کے موقع پر سینما گھروں کی زینت بنے گی۔