یورو بانڈز کا اجرا ء معاشی استحکام کی جانب اہم پیشرفت :پیاف

لاہور( این این آئی)پاکستان انڈسٹری اینڈ ٹریڈرز ایسوسی ایشن فرنٹ (پیاف)کے بانی میاں شفقت علی، پیٹرن چیف پیاف انجینئر سہیل لاشاری
چیئرمین سید محمود غزنوی، سینئر وائس چیئرمین خواجہ کاشف الٰہی، وائس چیئرمین راجہ وسیم حسن اور چیئرمین ایسوسی ایٹ کلاس فرخ احسان خان نے اپنے مشترکہ بیان میں کہا ہے کہ حکومت کی جانب سے 3 ارب ڈالر مالیت کے یورو بانڈز کا اجرا ء عالمی مالیاتی منڈی میں پاکستان کی بہتر ہوتی ہوئی ساکھ اور کریڈٹ ریٹنگ میں بہتری کا عکاس ہے تاہم بلند شرح سود پر حاصل کیے جانے والے بیرونی قرضوں کے طویل مدتی اثرات کو بھی پیش نظر رکھنا ہوگا۔ انہوں نے کہا کہ یورو بانڈز کے اجرا ء سے قرضوں کی ری فنانسنگ اور رول اوور کے دبا ئومیں کمی لانے میں مدد مل سکتی ہے تاہم بیرونی قرضوں پر انحصار کم کرنے کے لیے برآمدات میں اضافہ اور زرمبادلہ کے مستقل ذرائع پیدا کرنا ناگزیر ہے۔ پیاف کے رہنمائوں نے کہا کہ حکومت کو بہتر ہوتی ہوئی کریڈٹ ریٹنگ سے فائدہ اٹھاتے ہوئے مستقبل میں کم شرح سود پر فنانسنگ کے مواقع پیدا کرنے چاہئیں۔ انہوں نے تجویز دی کہ حاصل کیے جانے والے قرضوں کو غیر پیداواری اخراجات کے بجائے صنعتی، برآمدی اور پیداواری شعبوں میں استعمال کیا جائے تاکہ قرض کی ادائیگی کی صلاحیت بہتر ہو سکے۔ کاروباری لاگت میں کمی، توانائی کی مسابقتی قیمتوں، سستی فنانسنگ اور ٹیکس نظام میں آسانیاں پیدا کیے بغیر معاشی نمو کی رفتار تیز کرنا مشکل ہوگا۔ پیاف کے رہنمائوں نے حکومت پر زور دیا کہ نجی شعبے کو بیرونی سرمایہ اور جدید مشینری کے حصول میں درپیش رکاوٹیں دور کی جائیں اور براہ راست غیر ملکی سرمایہ کاری کے لیے پالیسیوں میں تسلسل یقینی بنایا جائے۔