اسلام آباد: نائب وزیراعظم اسحق ڈار نے کہا ہے کہ اکیسویں صدی کے چیلنجز کا مقابلہ کرنے کے لیے پاکستان کامن ویلتھ کا ساتھ دے گا، پاکستان رکن کی حیثیت سے دولت مشترکہ اور اس کے اداروں کو بہت اہمیت دیتا ہے۔
سیکرٹری جنرل دولت مشترکہ پیٹریشیا اسکاٹ لینڈ کے ہمراہ مشترکہ پریس کانفرنس کرتے ہوئے اسحاق ڈار کا کہنا تھا کہ پیٹریشیا اسکاٹ لینڈ کے پہلے دورہ پاکستان کا خیر مقدم کرتا ہوں، سیکرٹری جنرل کی موجودگی پاکستان اور دولت مشترکہ کے مضبوط تعلقات کی نشانی ہے۔
انہوں نے کہا کہ سیکرٹری جنرل کے موسمیاتی تبدیلیوں میں تعاون کے شکر گزار ہیں، گزشتہ 8 سال میں پیٹریشیا نے دولت مشترکہ میں اہم کردار ادا کیا ہے، دولت مشترکہ کی اقدار کے فروغ میں پیٹریشیا کا کردار لائق تحسین ہے۔
انہوں نے کہا کہ پاکستان کو موسمیاتی تبدیلی سمیت مختلف چیلنجز کا سامنا ہے، دولت مشترکہ عالمی چیلنجز کے پیش نظر شراکت داری کو فروغ دینے کا اہم پلیٹ فارم ہے، 21 ویں صدی کےچیلنجز کا مقابلہ کرنے کیلئے پاکستان کامن ویلتھ کا ساتھ دے گا۔
اسحاق ڈار کا کہنا تھا کہ پاکستان رکن کی حیثیت سے دولت مشترکہ اور اس کے اداروں کو بہت اہمیت دیتا ہے، ریاستی تعلقات کے اصولوں کو برقرار رکھنے میں دولت مشترکہ کا کردار اہم ہے، رکن ممالک کے درمیان تنازعات کے حل کیلئے دولت مشترکہ کو کردار ادا کرنا چاہیے۔
انہوں نے کہا کہ ہماری حکومت سینٹرل ایشیا ممالک کے ساتھ بھی کنیکٹیویٹی بڑھانے پر کام کررہے ہیں،دولت مشترکہ کے 2 ٹریلین تجارت کے حجم کو بڑھانے کے لئے اقدامات قابل ستائش ہیں۔
پیٹریشیا اسکاٹ لینڈ نے کہا کہ پاکستان نے مشکلات کا سامنا بہت ہمت سے کیا ہے، سب جانتے ہیں کہ 33 ملین پاکستانی 2022 کے سیلاب سے متاثر ہوئے۔ ان کاکہنا تھا کہ دولت مشترکہ ایک اہم پلیٹ فارم ہے، اس پلیٹ فارم سے بہت سے اہم کام ہونا ابھی باقی ہیں۔
سیکریٹری جنرل پیٹریشیا اسکاٹ لینڈ نے کہا کہ پاکستان میں 35 ملین افراد سیلاب سے متاثر ہوئے، دو ملین افراد سیلاب کی وجہ سے بے گھر ہوئے، ہم پاکستانیوں کے ساتھ ہیں۔
ان کا کہنا تھا کہ پاکستان میں نوجوانوں کی ایک بڑی تعداد موجود ہے، یہ نوجوان مستقل کے لئے ایک اہم اثاثہ ہیں، یہ ہی نوجوان مستقبل میں پاکستان کی تعمیر و ترقی میں اپنا کردار ادا کریں گے۔
