پاکستان کے سابق کرکٹر اظہر عباس کے بیٹے محمد ارسلان عباس اپنے ہی ملک کے خلاف ڈیبیو کرنے میدان میں اُتریں گے۔
نیوزی لینڈ کرکٹ بورڈ نے پاکستان کے خلاف ہونے والے تین ون ڈے انٹرنیشنل میچز کے لیے اسکواڈ کا اعلان کیا ہے جس میں محمد ارسلان عباس کو شامل کیا گیا ہے جو پاکستان میں فرسٹ کلاس کرکٹ کھیلنے والے اظہر عباس کے بیٹے ہیں۔
پاکستانی نژاد محمد ارسلان عباس فرسٹ کلاس کرکٹر اظہر عباس کے بیٹے ہیں، جنہیں 45 فرسٹ کلاس میچز کھیلنے کا اعزاز حاصل ہے۔
پاکستان میں پیدا ہونیوالے اظہر عباس اپنے خاندان کے ہمراہ نیوزی لینڈ منتقل ہوگئے تھے، وہاں بھی انہوں نے کرکٹ کو بطور پروفیشن اختیار کیا جبکہ آکلینڈ اور ویلنگٹن کیلئے بھی کھیلا، وہ اس وقت فائر برڈز کے اسسٹنٹ کوچ ہیں۔
اظہر عباس پاکستان میں ڈومیسٹک کرکٹ کھیلتے رہے ہیں جس کے بعد وہ نیوزی لینڈ منتقل ہوئے، اُس وقت محمد عباس کی عمر محض ایک برس تھی۔
اظہر عباس نے نیوزی لینڈ میں بھی ڈومیسٹک کرکٹ کھیلی، اور اب ڈومیسٹک کرکٹ میں ویلنگٹن فائر برڈز کے اسسٹنٹ کوچ ہیں۔
انکے بیٹے ارسلان عباس کو ڈومیسٹک کارکردگی کی بنیاد پر نیوزی لینڈ اسکواڈ کا حصہ بنایا گیا ہے، وہ مڈل آرڈر میں بیٹنگ کے علاوہ بالنگ کے فرائض بھی نبھانے کی صلاحیت رکھتے ہیں۔
بیٹے کے ڈیبیو پر والد کے تاثرات
آل راؤنڈر محمد ارسلان عباس کے والد سابق فرسٹ کلاس کرکٹر اظہر عباس نے گفتگو کرتے ہو ئے کہا ہے کہ میں اس وقت بہت خوش ہوں۔
انہوں نے کہا کہ محمد ارسلان عباس خود کو فائٹر ثابت کرے گا، وہ ٹف ٹائم دینے کی کوشش کرتا ہے ، حریف ٹیم کوئی بھی ہو، پاکستان کے خلاف اچھا میچ ہوگا۔
اظہر عباس نے کہا کہ خوشی کی بات یہ ہے بیٹے کو پاکستان کے خلاف کھیلنے کا موقع مل رہا ہے، پاکستان ٹیم بھی اچھی ہے۔
انہوں نے کہا کہ محمد عباس نیوزی لینڈ ڈومیسٹک کرکٹ میں ڈھائی برس سے کھیل رہے ہیں، محمد عباس کی ان ڈھائی برسوں میں پرفارمنس تسلسل کے ساتھ اچھی رہی ہے۔
‘ہمارا تعلق ضلع خانیوال کے ایک چھوٹے سے گاؤں سے ہے’
اظہر عباس نے بتایا کہ ہمارا تعلق ضلع خانیوال کے ایک چھوٹے سے گاؤں روشن پور سے ہے، پاکستان میں ڈومیسٹک کرکٹ کھیلی، نیوزی لینڈ منتقل ہونے کے بعد یہاں کرکٹ کھیلی۔
انہوں نے کہا کہ محمد عباس کا پورا نام محمد ارسلان عباس ہے، پیدا ہوتے ہی اس کو کرکٹر بنانے کی ٹھان لی تھی، میرا ٹارگٹ تھا کہ بیٹے کو میں نے کرکٹر بنانا ہے، میں نے جو محنت کی اور تجربہ حاصل کیا وہ عباس میں منتقل کیا۔
اظہر عباس نے کہا کہ ہم ہیں تو پاکستانی لیکن یہاں رہتے ہوئے نیوزی لینڈ کی جانب سے کھیلنے کا موقع ملا۔
