وزیراعظم شہباز شریف نے اس عزم کا اظہار کیا ہے کہ خطے میں ٹرانزٹ ٹریڈ کیلیے پاکستان قابل اعتبار اور مؤثر اقتصادی راہداری قائم کرے گا۔
وزیراعظم محمد شہباز شریف سے عالمی شپنگ کمپنی A. P. Moller – Maersk کے بورڈ آف ڈائریکٹرز کے چیئرمین رابرٹ میرسک کی ملاقات ہوئی۔ جس میں وزیراعظم نے کمپنی کی جانب سے پاکستان میں دو ارب ڈالرز کی سرمایہ کاری کا خیر مقدم کیا۔
وزیراعظم نے ہدایت کی کہ گزشتہ سال A. P Moller – Maersk کے ساتھ دستخط کی گئی یاداشتوں کو جلد از جلد معاہدوں کی شکل دی جائے جبکہ عالمی شپنگ کمپنی کے ساتھ میری ٹائم سیکٹر میں اشتراک کے معاہدے کی تشکیل کے عمل کو تیز کرنے کے لیے ٹیکنیکل ورکنگ گروپ بنایا جائے۔
وزیراعظم نے ورکنگ گروپ کو ایک مہینے کے اندر سفارشات پیش کرنے کی ہدایت دی۔
شہباز شریف کا کہنا تھا کہ اب وقت ہے کہ تمام رکاوٹیں دور کر کے میری ٹائم شعبے کو عالمی مسابقتی معیار پر لایا جائے، غیر ملکی شپنگ کمپنی کی جانب سے پاکستان میں سرمایہ کاری سے پاکستان کے میری ٹائم سیکٹر میں وسیع پیمانے پر مثبت تبدیلی آئے گی۔
انہوں نے کہا کہ اللہ تعالیٰ نے پاکستان کو وسیع سمندری وسائل سے نوازا ہے، اور اس شعبے کی استعداد سے فائدہ اٹھا کر انہیں ملک کی بہتری استعمال کرنے کے لئے کوشاں ہیں۔
وزیراعظم نے کہا کہ حالیہ عالمی منظر نامے میں خطے میں تجارت اور نقل و حمل کے لیے پاکستان کی بطور راہداری اہمیت میں اضافہ ہوا ہے، ملکی معیشت کی ترقی کے لیے ضروری ہے کے ہم خطے میں ٹرانزٹ ٹریڈ کے لیے پاکستان کو ایک قابل اعتبار اور مؤثر اقتصادی راہداری کے طور پر قائم کریں۔
وزیراعظم نے ملاقات میں A.P. Moller – Maersk کو پاکستان میں مزید سرمایہ کاری کے مواقع تلاش کرنے کی دعوت دی جبکہ میرسک نے پاکستان میں سرمایہ کاری اور کاروبار کے مواقعوں سے فائدہ اٹھانے میں دلچسپی کا اظہار کیا۔
انہوں نے بتایا کہ اس خطے میں A.P. Moller – Maersk کا پہلا بحری جہاز 1924 میں آیا اور آج خطے میں پاکستان کے ساتھ ہمارے تعلقات کسی بھی دور کے مقابلے میں مضبوط ترین ہیں، پاکستان کا وسط ایشیائی ممالک کے ساتھ تجارت کے لیے اس خطے میں بطور اقتصادی راہداری کلیدی کردار ہے جو کہ ہماری کمپنی کے لیے انتہائی اہم ہے۔
رابرٹ میرسک نے پاکستان کے سی پورٹس میں سرمایہ کاری میں دلچسپی کا اظہار کیا اور پاکستان کی بندرگاہوں میں لاجسٹکس کا جدید ترین نظام اور انکو جدید ترین ٹیکنالوجی سے لیس کر کے خطے میں بذریعہ سمندر تجارت کے لیے ایک منفرد مرکز قائم کرنے کی خواہش کا اظہار بھی کیا ۔
رابرٹ میرسک نے حکومت کی معاشی پالیسیوں کی تعریف کرتے ہوئے انہیں سرمایہ کاری کو راغب کرنے کے لئے پر کشش قرار دیا۔
اس ملاقات میں عالمی شپنگ کمپنی کے ڈی ای او کیتھ سوینڈسن، ڈنمارک کے سفیر جیکب لینلف، وزیر خزانہ محمد اورنگزیب، وفاقی وزیر اقتصادی امور احد خان چیمہ، وزیر بحری امور محمد جنید انور چوہدری، وزیراعظم کے مشیر سید توقیر شاہ، معاون خصوصی طارق فاطمی اور متعلقہ اداروں کے اعلیٰ افسران شریک تھے۔
