پاکستان کے فاسٹ بولر حارث رؤف نے بنگلادیش کے خلاف دوسرے ٹی ٹوئنٹی میں کامیابی کے بعد کہا کہ ہمارے بیٹرز ماڈرن ڈے کرکٹ کھیل رہے ہیں، بولرز کی بھی کوشش ہوتی ہے کہ کم سے کم رنز دیں۔
جمعہ کو پاکستان نےسیریز کے دوسرے ٹی ٹوئنٹی میں بنگلادیش کو 57 رنز سے ہراکر 3 میچوں کی سیریز میں 2 صفر کی فیصلہ کن برتری حاصل کرلی۔
پاکستان نے 6 وکٹ کے نقصان پر 201 رنز بنائے، جواب میں بنگلادیشی ٹیم 144 رنز پر ڈھیر ہوگئی۔
میچ کے بعد گفتگو کرتے ہوئے حارث رؤف نےکہا کہ ٹی ٹوئنٹی میں اب 200 رنز پار اسکور ہو چکا ہے، ہمارے بیٹرز ماڈرن ڈے کرکٹ کھیل رہے ہیں۔
انہوں نےکہا کہ جو دستیاب کھلاڑی ہوتے ہیں انہیں ہی پارٹنر سمجھتے ہیں، شاہین اور نسیم کے ساتھ کافی کرکٹ کھیلی ہے، حسن علی کے ساتھ اب کھیلنے کا موقع مل رہا ہے، ان سے سیکھ رہا ہوں، ہمیں صورتحال کے مطابق پلان دیا جا رہا ہے، چھوٹی چھوٹی چیزوں کو بہتر کر رہے ہیں ان کا ہی فائدہ ہوتا ہے۔
حارث رؤف نے کہا کہ دنیا بھر میں بہترین بولرز کو روٹیشن پالیسی کے تحت کھلایا جاتا ہے، ہمارے پاس بنچ اسٹرنتھ نہیں تھی، ہمیں مسلسل کھیلنا پڑا، مستقبل میں روٹیشن پالیسی اپنائی جا سکتی ہے۔
اس کے علاوہ قومی فاسٹ بولر کا کہنا تھا کہ منیجمنٹ، کوچ اور کپتان تبدیل ہوتے رہے ہیں، اس سے ٹیم ڈسٹرب ہوتی ہے پھر اس طرح کے ہی ریزلٹ آتے ہیں، جو منیجمنٹ اور ٹیم بناتے ہیں وہ لانگ ٹرم کا پلان ہوتا ہے ،کوئی چھ مہینے کا پلان کر کے نہیں آتا، اب نئی منیجمنٹ ہے، سلمان علی آغا سپورٹ کر رہے ہیں، ریزلٹ اچھے آئیں گے۔
