اسلام آباد: صدر مملکت آصف علی زرداری کا کہنا ہے کہ بھارت کشمیریوں کو ان ہی کی سرزمین میں اقلیت میں بدلنے کی کوشش کر رہا ہے۔
یومِ سیاہ کشمیر پر پیغام اپنے پیغام میں صدر آصف زرداری نے کہا کہ 27اکتوبر 1947 کشمیر کی تاریخ کا سیاہ ترین دن ہے، اس دن بھارتی افواج کا سری نگر پر قبضہ بین الاقوامی قوانین کی کھلی خلاف ورزی تھی، کشمیری نسل در نسل بھارتی ظلم و جبر اور انسانی حقوق کی پامالی کا شکار ہیں۔
صدر مملکت نے کہا کہ بھارت کی 5 اگست 2019 کی کارروائیاں غیر قانونی اور غیر اخلاقی ہیں، کشمیر کی خصوصی حیثیت ختم کر کے بھارت نے عالمی معاہدوں کی خلاف ورزی کی، کشمیریوں پر اجتماعی سزائیں، املاک کی تباہی اور فوجی محاصرہ ناقابلِ قبول ہیں۔
انہوں نے کہا کہ بھارت کشمیریوں کو ان کی ہی سرزمین میں اقلیت میں بدلنے کی کوشش کر رہا ہے، عالمی برادری بھارت کو انسانی حقوق کی خلاف ورزیوں پر جوابدہ ٹھہرائے، بھارت کے حالیہ جارحانہ اقدامات خطے کے امن کے لیے خطرہ ہیں۔
صدر زرداری کا کہنا تھا کہ یومِ سیاہ کشمیر پر پوری قوم کشمیری عوام کے ساتھ اظہارِ یکجہتی کر رہی ہے، پاکستان کشمیری عوام کی اخلاقی، سیاسی اور سفارتی حمایت جاری رکھے گا۔
مقبوضہ کشمیر میں یوم سیاہ کے موقع پر نائب وزیراعظم اسحاق ڈار نے اپنے پیغام میں کہا کہ بھارتی قبضے کے 78برس بعد بھی کشمیری عوام ظلم و جبر کا شکار ہیں، بھارت نے اقوام متحدہ کی قراردادوں کی مسلسل خلاف ورزی کی جبکہ پاکستان سلامتی کونسل کی قراردادوں کی پاسداری کے عزم پر قائم ہے۔
ان کا کہنا تھاکہ بھارت کے 5اگست 2019 کے غیرقانونی اقدامات نے کشمیریوں کی مشکلات بڑھادیں، غیر کشمیریوں کو ڈومیسائل جاری کرکے بھارت آبادی کا تناسب بدل رہا ہے، بھارت کی انسانی حقوق کی خلاف ورزیاں عالمی اداروں کے رکارڈ کا حصہ ہیں۔
