ریاض (14 مئی 2026): دنیا بھر سے اب تک لاکھوں مسلمان فریضہ حج کی ادائیگی کے لیے آ چکے ہیں جن کے لیے رہنما گائیڈ جاری ہے۔
حج اسلام کا پانچواں رکن اور ہر صاحب استطاعت پر فرض ہے۔ ہر سال دنیا بھر سے لاکھوں مسلمان اس فریضہ کی ادائیگی کے لیے آتے ہیں اور اب تک 8 لاکھ سے زائد عازمین حج سعودی عرب پہنچ چکے ہیں۔
کئی سال سے حج کا سیزن شدید گرمی میں آ رہا ہے اور اس بار بھی دنیا بھر کی طرح سعودی عرب میں موسم انتہائی گرم ہے۔ ایسے میں سعودی وزارت حج نے عازمین کے لیے رہنما گائیڈ جاری کی ہے، جس میں انہیں دوران حج اہم امور کا خیال رکھنے کی ہدایت کی گئی ہے۔
سالِ رواں وزارتِ صحت نے اردو سمیت آٹھ زبانوں میں حج رہنما گائیڈ جاری کی ہے۔ پی ڈی ایف کی صورت میں جاری کی گئی گائیڈ بک کو با آسانی ڈاون لوڈ کیا جا سکتا ہے۔
عازمین حج کن امور کا خیال رکھیں:
گائیڈ بک میں عازمین کے لیے بنیادی و اہم احتیاطی تدابیر کو بیان کیا گیا ہے جس کا آغاز سفرِ حج کی تیاریوں سے ہوتا ہے۔ حج کے سفر پر روانگی سے قبل جسمانی صحت کے بارے میں یقین دہانی کرنے کے لیے طبی مشورہ کرنے کی خاص طور پر ہدایت کی گئی ہے۔
رہنمائی کا دوسرا مرحلہ دوران حج کے بارے میں ہدایات پر عمل کرنے کا ہے۔ سب سے اہم نکتہ جسمانی صحت و صفائی کا خیال رکھنا کا ہے۔ مشاعر مقدسہ میں رہنے کے دوران براہ راست تیز دھوپ سے بچنے کی ہدایت کی گئی ہے، لو لگنے کی صورت میں کیا ہوتا ہے اور اس سے بچاؤ کس طرح کیا جائے۔
عازمین حج کو اپنے سفرِ حج کے آغاز سے اختتام تک خوراک کے حوالے سے سب سے اہم نکتے کو مد نظر رکھنا چاہیے، ہمیشہ تازہ اور اچھی خوراک استعمال کریں، کھانا شروع کرنے سے قبل ہاتھوں کو اچھی طرح دھوئیں، ایسا کھانا جو بغیر حفاظتی تدابیر کے رکھا گیا ہو یا گرمی میں کافی دیر باہر رہنے سے خراب ہو گیا ہو اسے قطعی استعمال نہ کریں۔
گائیڈ میں کہا گیا ہے کہ سفرِ حج جسمانی مشقت ہے، ایسے میں اپنی صحت کا خاص خیال رکھیں تاکہ خشوع و خضوع سے حج کا عظیم فریضہ بخوبی ادا کر سکیں۔
