اسلام آباد (23 مئی 2026): وزیر اعظم میاں شہباز شریف 4 روزہ دورہ چین پر روانہ ہو گئے۔
وزیر اعظم پاکستان شہباز شریف چین کے دورے کے پہلے مرحلے میں ہانگژو پہنچیں گے، اسحاق ڈار، احسن اقبال، عطا تارڑ، شزہ فاطمہ، اور طارق فاطمی بھی وزیر اعظم کے ہمراہ ہیں۔
وزیر اعظم ہانگژو میں ژجیانگ صوبے کے پارٹی سیکریٹری سے ملاقات کریں گے، اور سی پیک فیز ٹو کے تحت منعقدہ بزنس فورم میں شریک ہوں گے۔ بزنس فورم کے بعد شہباز شریف انتہائی اہم ملاقاتوں کے لیے بیجنگ روانہ ہوں گے۔
وزیر اعظم شہباز شریف کی بیجنگ میں چینی صدر شی جن پنگ اور دیگر اعلا حکام سے ملاقاتیں ہوں گی، وہ دورے کے دوران چین کی کاروباری شخصیات سے بھی ملاقاتیں کریں گے۔
واضح رہے کہ ایران امریکا جنگ بندی کے سلسلے میں پاکستان کے فیلڈ مارشل عاصم منیر ایک بار پھر تہران پہنچ گئے ہیں، ایرانی وزیر داخلہ اسکندر مومنی نے ان کا استقبال کیا۔ وزیر داخلہ محسن نقوی بھی ان کے ہمراہ موجود تھے۔
آئی ایس پی آر کا کہنا ہے عاصم منیر کی تہران آمد امن کے لیے ثالثی کی کوششوں کا حصہ ہے، وہ اعلیٰ ایرانی شخصیات سے ملاقات کریں گے، ایران کے سپریم لیڈر مجتبیٰ خامنہ ای سے بھی ملاقات متوقع ہے۔ عاصم منیر تہران میں ایران امریکا مذاکرات، خطے میں امن و دیگر اہم امور پر بھی بات کریں گے۔ خبر ایجنسی روئٹرز کے مطابق قطر کا مذاکراتی وفد بھی تہران پہنچ گیا ہے، امریکا اور ایران کے درمیان مستقل جنگ بندی جلد ہونے کا امکان ہے۔
