لاہور کے مختلف علاقوں میں مقابلوں کے دوران 2 ڈاکو زخمی حالت میں گرفتار

لاہور (کرائم رپورٹر) صوبائی دارالحکومت میں مختلف علاقوں میں مبینہ مقابلوں کے دوران دو ڈاکو زخمی حالت میں گرفتار کر لیے گئے جبکہ ان کے ساتھی فرار ہونے میں کامیاب ہو گئے۔ پولیس نے دونوں ڈاکوئوں کو طبی امداد کے لیے ہسپتال منتقل کرکے فرار ہونے والے ساتھیوں کی تلاش شروع کر دی۔ تفصیلات کے مطابق سندر پولیس نے ناکہ پر2 موٹر سائیکل سواروں کو رکنے کا اشارہ کیا تو ملزمان نے رکنے کی بجائے پولیس پر سیدھی فائرنگ کر دی اور فرار ہونے کی کوشش کی اس دوران پولیس نے فرار ہونے والے ملازمین کا تعاقب کیا تو1 ملزم اپنے ساتھی کی فائرنگ سے زخمی ہو گیا جسے گرفتار کر لیا گیا جبکہ دوسرا فرار ہونے میں کامیاب ہو گیا’ زخمی ملزم کی شناخت خالد یونس کے نام سے ہوئی جو ڈکیتی سمیت دیگر سنگین مقدمات میں سابقہ ریکارڈ یافتہ ہے۔ دوسرا مبینہ پولیس مقابلہ رائیونڈ کے علاقے لاکھووال روہی نالہ کے قریب پولیس اور مسلح ڈاکوئوں کے درمیان ہوا جہاں ناکہ بندی کے دوران تین مشتبہ موٹر سائیکل سواروں کو رکنے کا اشارہ کیا انہوں نے رکنے کے بجائے پولیس اہلکاروں پر فائرنگ کردی پولیس کی جوابی کارروائی کے دوران ملزم عرفان ولد غلام فرید اپنے ہی ساتھیوں کی فائرنگ سے زخمی ہوگیا جسے گرفتار کرلیا گیا جبکہ اس کے ساتھی فرار ہو گئے۔ پولیس کا کہنا ہے کہ ملزم کے بائیں کان اور دائیں ٹانگ پر گولیاں لگیں ہیں اس کے فرار ہونے والے ساتھیوں کی شناخت مدثر ولد عاشق اور مقصود ولد حاجی خان کے نام سے ہوئی ہے جن کی تلاش جاری ہے۔