لاہور ( خبر نگار) امیر جماعت اسلامی پاکستان حافظ نعیم الرحمن کی اپیل پر مہنگائی، معاشی بدحالی اور حکومت کی معاشی پالیسیوں کے خلاف ملک بھر میں جاری احتجاجی دھرنوں کا سلسلہ 30ویں روز بھی جاری رہا۔ لاہور سمیت کراچی، کوئٹہ، حیدرآباد، پشاور، راولپنڈی، سرگودھا، گجرات، مانسہرہ، چترال سمیت 40 سے زائد مقامات پر دھرنے دیے جا رہے ہیں، جن میں عوام کی بڑی تعداد شریک ہو رہی ہے۔مختلف شہروں میں جاری احتجاجی دھرنوں میں ہر شعبہ ہائے زندگی سے تعلق رکھنے والے مرد و خواتین، نوجوان، بچے اور بزرگ شرکت کر رہے ہیں۔ شرکا نے حکومت کی معاشی پالیسیوں، بڑھتی ہوئی مہنگائی، عوام پر بڑھتے ہوئے مالی بوجھ اور بنیادی ضروریات زندگی کی قیمتوں میں اضافے کے خلاف شدید احتجاج کیا۔لاہور میں پنجاب اسمبلی کے باہرجماعت اسلامی کا احتجاجی دھرنا مسلسل 30روز سے جاری ہے، جس میں ہزاروں مرد و خواتین شریک ہیں۔ دھرنے کے شرکا نے حکومت سے مطالبہ کیا کہ عوام کو ریلیف فراہم کیا جائے، مہنگائی پر قابو پایا جائے اور ایسی معاشی پالیسیاں ختم کی جائیں جن سے عام آدمی کی مشکلات میں مسلسل اضافہ ہو رہا ہے۔
