بینکاری شعبے کی بیلنس شیٹ میں 9.1 فیصد اضافہ ہوا:سٹیٹ بینک

کراچی(سٹاف رپورٹر) بینک دولت پاکستان نے 2026 ء کی پہلی ششماہی کے دوران بینکاری شعبے کی کارکردگی کا جائزہ آج جاری کردیا۔ اس
جائزے میں پہلی ششماہی یعنی جنوری تا جون 2026ء کے دوران بینکوں کی کارکردگی اور مضبوطی کا احاطہ کیا گیا ہے۔ اس میں مالی منڈیوں کی کارکردگی اور نظامیاتی خطرے کے سروے (ایس آر ایس) کے نتائج پر بھی مختصر بحث کی گئی ہے۔ سروے میں غیر جانبدار ماہرین کی وہ آرا شامل ہیں جو انہوں نے مالی استحکام کو لاحق موجودہ اور ممکنہ خطرات کے بارے میں ظاہر کی ہیںجائزے میں نوٹ کیا گیا ہے کہ بینکاری شعبے کی بیلنس شیٹ میں 9.1 فیصد اضافہ ہوا جس کی سب سے بڑی وجہ سرکاری تمسکات میں سرمایہ کاری تھی سرکاری اور نجی دونوں شعبوں کے قرضوں میں اضافہ ہوا۔ خوش آئند بات یہ ہے کہ ایس ایم ای اداروں کو طویل مدتی مالکاری 2026ء کی پہلی ششماہی کے دوران مسلسل بڑھتی رہی۔ اس کے علاوہ، حکومت کی رعایتی سکیم کی وجہ سے رہن کے قرضے لینے کا رجحان مزید بڑھ گیا بینکوں نے زیرِ جائزہ مدت کے دوران مزید 3,673 ارب روپے جمع کیے۔ جائزے سے پتہ چلتا ہے کہ 2026ء پہلی ششماہی کے دوران بینکاری شعبے کے قرضہ جاتی خطرے نے مالی استحکام کے لیے کسی تشویش کو جنم نہیں دیا غیر فعال قرضوں میں نمایاں کمی اور قرضوں میں اضافے کے نتیجے میں غیر فعال قرضوں کا مجموعی قرضوں سے تناسب جون 2026ء میں کم ہوکر 5.5 فیصد رہ گیا جو دسمبر 2025ء میں 6.1 فیصد تھا حوصلہ افزا بات یہ ہے کہ قرضوں کے مقابلے میں تموین کی کوریج کا تناسب بھی دسمبر 2025ء کے 107.7 فیصد سے مزید بہتر ہوکر جون 2026ء میں 110.2 فیصد ہوگیا تاہم، شعبے کی آمدنی میں اضافہ نسبتاً محدود رہا۔ چنانچہ، اثاثوں پر منافع اور ایکویٹی پر منافع جون 2026ء میں بالترتیب 1.1 فیصد اور 19.0 فیصد رہ گئے جو جون 2025ء میں بالترتیب 1.3 فیصد اور 21.3 فیصد تھے شعبے کی ادائیگی قرض کی صلاحیت، شرح کفایت سرمایہ (سی اے آر) 19.6 فیصد کیساتھ 2026ء کی پہلی ششماہی کے دوران مضبوط رہی۔ میکرو سٹریس ٹیسٹ کے حالیہ نتائج سے ظاہر ہوتا ہے کہ بینکاری شعبہ بالعموم اور بالخصوص نظامیاتی اہمیت کے حامل بڑے بینک آئندہ دو سال کے دوران ادائیگی قرض کی استعداد ، استحکام کے اظہار اور حتیٰ کہ شدید نوعیت کے دھچکے برداشت کرنے کی صلاحیت برقرار رکھیں گے۔