لاہور(کورٹ رپورٹر )لاہور ہائیکورٹ کے
جسٹس صادق محمود خرم نے قانونی اور قونصلر معاونت فراہم کرنے کیلئے سید سلمان رضا زیدی اور جنید جہانگیر کی درخواست پر سیکرٹری وفاقی وزارتِ خارجہ کو 15روز میں فیصلہ کرنے کا حکم دے دیا، درخواست گزاران کے وکیل بیرسٹر ابوزر سلمان خان نیازی نے موقف اپنایا کہ پاکستانی شہری سید سلمان رضا زیدی اور جنید جہانگیر تحریک انصاف سے وابسطہ ہیں،پاکستانی شہری 27ستمبر 2024کو شارجہ میں اپنی رہائش گاہ سے لاپتہ ہوئے، اطلاعات کے مطابق دونوں شہریوں کو متحدہ عرب امارات کے حکام نے حراست میں لیا ہے، دو سال گزرنے کے باوجود شہریوں کے خلاف کوئی الزام یا عدالتی ریکارڈ کے بارے معلومات فراہم نہیں کی گئیں،وفاقی حکومت اور وزارتِ خارجہ کی جانب سے موثر قونصلر تحفظ اور قانونی معاونت فراہم نہیں کی جا رہی، استدعا ہے کہ عدالت وزارت خارجہ کو سلمان رضا زیدی اور جنید جہانگیر کو قانونی اور قونصلر معاونت فراہم کرنے کا حکم دے،یو اے ای حکومت سے شہریوں سے متعلق عدالتی ریکارڈ حاصل کیا جائے، عدالت وفاقی وزارت خارجہ کو شہریوں کو پاکستان واپسی کے لیے سفارتی سطح پر اقدامات کرنے کا حکم دے،عدالت وزارت خارجہ کی جانب سے اب تک کیے گئے اقدامات سے متعلق رپورٹ عدالت میں پیش کرنے کا حکم دے۔
