لاہور (افضل سیال سے) اینٹی کرپشن کا ڈر، دس روز سے پٹوار خانے بند، لاہور میں ریونیو امور ٹھپ، انتقالات و وراثتی معاملات شدید متاثر، سرکاری خزانے میں ٹیکس کی مد میں جمع ہونے والے کروڑوں روپے رک گئے ، پٹواری ، تحصلیدار اپنے دفاتر کا تالے لگا کر خودساختہ غائب ہو گئے۔ تفصیل کے مطابق اینٹی کرپشن کے چھاپوں کے ڈر سے لاہور شہر کے مختلف پٹوار خانوں میں دس روز سےزائد عرصے سے کام بند ہونے کے باعث شہریوں کو شدید مشکلات کا سامنا ہے۔ زمینوں کے انتقال، وراثتی معاملات اور جائیداد سے متعلق امور التوا کا شکار ہیں جبکہ شہری پٹوار خانوں کے باہر اپنے کام کے لیے انتظار کرنے پر مجبور ہیں۔ ریونیو سٹاف نے اینٹی کرپشن کی حالیہ کارروائیوں پر تحفظات کا اظہار کرتے ہوئے کہا ہے موجودہ حالات میں کام کرنا ممکن نہیں رہا، اینٹی کرپشن اپنے اختیارات کا ناجائز استعمال کرتے ہوئے کارروائی کر رہی ہے یہی وجہ ہے کہ لاہور کا ریونیو سٹاف اپنے دفاتر بند کرکے خودساختہ روپوش ہوچکا ہے اور دفاتر میں ہو کا عالم ہے جبکہ محکمہ انسداد رشوت ستانی کا موقف ہے کہ کارروائیاں قانون کے مطابق کی جارہی ہیں۔ ذرائع کے مطابق موجودہ صورتحال کے باعث عام شہری سب سے زیادہ متاثر ہو رہے ہیں۔ شہریوں کا مطالبہ ہے کہ کرپشن کے خلاف کارروائی بلاامتیاز جاری رکھتے ہوئے پٹوار خانوں میں سرکاری امور بھی فوری بحال کیے جائیں۔ شہریوں نے حکام پر زور دیا گیا ہے کہ زیرالتوا انتقالات اور وراثتی معاملات کے فوری ازالے کے لیے موثر انتظامات کیے جائیں اور ریونیو سٹاف و اینٹی کرپشن کے درمیان پیدا ہونے والی صورتحال کو جلد حل کیا جائے۔
