پشاور(آئی این پی )گورنر خیبرپختونخوا فیصل کریم کنڈی نے کہا ہے کہ دہشت گردی کا مقابلہ پوری سنجیدگی اور
عزم کے ساتھ کرنا ہوگا، دہشت گردی کے خلاف جنگ ہم سب نے متحد ہو کر لڑنی ہے۔وہ پشاور میں پولیس شہدا کے لواحقین میں پلاٹ الاٹمنٹ لیٹرز کی تقسیم کی تقریب سے خطاب کررہے تھے ۔فیصل کریم کنڈی نے کہا کہ آج یہاں گورنر کی حیثیت سے نہیں بلکہ شہدا کے خاندانوں کے ساتھ کھڑا ہونے آیا ہوں، شہدا ہمارے ہیرو ہیں، انہیں سلام پیش کرتا ہوں۔فیصل کریم کنڈی نے کہا کہ شہدا کے اہل خانہ کو یقین دلاتا ہوں کہ ان کا خون رائیگاں نہیں جانے دیں گے شہدا کی قربانیوں کا متبادل نہیں دے سکتے، لیکن آپ کو تنہا نہیں چھوڑیں گے، صوبے کے عوام، پاک فوج اور پولیس سمیت دیگر اداروں نے بے پناہ قربانیاں دی ہیں، آج ہم شہدا کی قربانیوں کی بدولت یہاں کھڑے ہی۔گونر خیبرپختونخوا نے کہا کہ دہشت گردی کا مقابلہ پوری سنجیدگی اور عزم کے ساتھ کرنا ہوگا، دہشت گردی کے خلاف جنگ ہم سب نے متحد ہو کر لڑنی ہے، محسن نقوی کا شکریہ ادا کرتا ہوں جنہوں نے پولیس کی استعداد بڑھانے کے لیے گاڑیاں فراہم کیں۔ انہوں نے کہا پورے صوبے کو پولیس کے ساتھ کھڑا ہونا ہوگا، صوبے کے ترقیاتی فنڈز ختم کر سکتے ہیں۔ پولیس کی تنخواہوں میں اضافہ، دوسرے صوبوں کی تنخواہوں کے برابر کر دیا ہے۔گورنر کا کہنا تھا کہ تمام اداروں کے تعاون سے دہشت گردی کے خاتمے کے لیے موثر حکمت عملی بنانا ہے، وفاقی وزیر داخلہ کا شکر گزار ہوں، وفاق صوبے کے ساتھ ہے۔ خیبرپختونخوا میں ایمرجنسی اور گورنر راج کے بعد پولیس کے شہدا پیکج میں اضافے سمیت بچوں کی تعلیم اور شادی کے لیے مالی معاونت کا بھی اعلان کر دیا گیا۔ گورنر کے پی کے نے کانسٹیبل سے ڈی آئی جی رینک شہید پیکج میں ایک کروڑ سے ڈیڑھ کروڑ روپے اضافے کا اعلان کیا جبکہ شہدا کے خاندانوں کے لئے گھر خریدنے کے لیے کیش پیکج کا اعلان بھی کیا۔گورنر نے پولیس اہلکاروں کے بچوں یا والدین کو قتل کرنے پر بھی مالی معاونت کا اعلان کیا۔ انہوں نے کہا کہ 50 لاکھ روپے فیملی افراد کو ٹارگٹ کرنے پر دیں گے۔
