کراچی :ٹریفک حادثات، ٹرک ‘واٹر ٹینکر کی ٹکر سے 2 موٹر سائیکل سوار جاں بحق

کراچی (این این آئی) شہر میں ہیوی ٹریفک کے باعث حادثات کا سلسلہ جاری ہے، مختلف علاقوں میں ٹرک اور واٹر ٹینکر کی ٹکر سے 2 موٹر سائیکل سوار جاں بحق ہوگئے جبکہ حادثات میں ملوث دونوں گاڑیوں کے ڈرائیور فرار ہوگئے۔ تفصیلات
کے مطابق پہلا حادثہ لانڈھی کے علاقے بھینس کالونی میں پیش آیا، جہاں تیز رفتار ٹرک نے موٹر سائیکل سوار کو کچل دیا، جس کے نتیجے میں وہ موقع پر ہی جاں بحق ہوگیا۔ دوسرا حادثہ منگھوپیر میں گرم چشمہ کے قریب پیش آیا جہاں تیز رفتار واٹر ٹینکر نے موٹر سائیکل سوار کو روند ڈالا، جس سے وہ جان کی بازی ہار گیا۔ اطلاع ملنے پر پولیس جائے وقوعہ پر پہنچی اور حادثات میں ملوث ٹرک اور واٹر ٹینکر کو تحویل میں لے لیا۔ پولیس نے فرار ہونے والے ڈرائیوروں کی تلاش شروع کردی ہے۔ واضح رہے کہ رواں سال کراچی میں ٹریفک حادثات کے نتیجے میں جاں بحق ہونے والے افراد کی تعداد 697 ہوگئی ہے۔ شہریوں نے ہیوی ٹریفک کے باعث بڑھتے حادثات پر تشویش کا اظہار کرتے ہوئے متعلقہ حکام سے مطالبہ کیا ہے کہ ٹریفک قوانین پر سختی سے عمل درآمد یقینی بنایا جائے اور خلاف ورزی کرنے والوں کے خلاف کارروائی کی جائے۔