اسلام آباد (ملک منظور احمد) ہنگری کے قومی دن کے موقع پر اسلام آباد میں ایک پروقار تقریب کا انعقاد کیا گیا، جس میں گورنر خیبرپختونخوا فیصل کریم کنڈی نے بطور مہمانِ خصوصی شرکت کی۔ تقریب میں مختلف ممالک کے سفارت کاروں، سرکاری حکام اور کاروباری برادری کے نمائندوں نے شرکت کی۔ اس موقع پر پاکستان اور ہنگری کے درمیان دوستانہ تعلقات، باہمی تعاون اور مختلف شعبوں میں دوطرفہ روابط کو مزید مضبوط بنانے کے امکانات پر روشنی ڈالی گئی۔ تقریب سے خطاب کرتے ہوئے گورنر خیبرپختونخوا فیصل کریم کنڈی نے کہا کہ پاکستان ہنگری کے ساتھ اپنے تعلقات کو قدر کی نگاہ سے دیکھتا ہے اور دونوں ممالک کے درمیان تعاون کو مزید وسعت دینے کا خواہاں ہے۔ انہوں نے کہا کہ پاکستان اور ہنگری کے تعلقات باہمی احترام اور تعاون پر مبنی ہیں اور آنے والے برسوں میں ان تعلقات کو مزید مضبوط بنانے کے وسیع امکانات موجود ہیں۔
فیصل کریم کنڈی نے کہا کہ ہنگری کی کمپنیاں پاکستان میں مختلف شعبوں میں اچھی کارکردگی کا مظاہرہ کر رہی ہیں اور ملکی معیشت میں اپنا کردار ادا کر رہی ہیں۔ انہوں نے کہا کہ تجارت، سرمایہ کاری اور باہمی دلچسپی کے دیگر شعبوں میں تعاون بڑھانے کے لیے نمایاں مواقع موجود ہیں، جن سے دونوں ممالک مستفید ہو سکتے ہیں۔اس موقع پر ہنگری کے سفیر نے بھی خطاب کیا اور پاکستان کے ساتھ دوستانہ تعلقات کو مزید مستحکم بنانے کے عزم کا اظہار کیا۔ انہوں نے دوطرفہ تعاون کو فروغ دینے اور دونوں ممالک کے عوام کے درمیان روابط مضبوط بنانے کی اہمیت پر زور دیا۔
تقریب میں شریک سفارت کاروں، سرکاری حکام اور کاروباری شخصیات نے پاکستان اور ہنگری کے درمیان تعلقات کو مزید مستحکم بنانے اور تجارت و سرمایہ کاری سمیت مختلف شعبوں میں تعاون کے فروغ کی اہمیت کو اجاگر کیا۔
